ملير ۾ پوليس پاران 2ڏوهارين کي زخمي حالت ۾ گرفتار ڪرڻ جي دعويٰ

ملير (رپورٽ: عبدالرشيد مورجھريو) ملير پوليس مختلف ڪاررواين دوران چئن جوابدارن کي گرفتار ڪري ورتو، جڏهن ته هٿيار، روڪ رقم، موبائل فون ۽ ڦر ٿيل موٽر سائيڪل پڻ برآمد ڪئي وئي آهي۔پوليس موجب پهرين ڪارروائي سڪڻ ٿاڻي جي حدن روڊ نمبر 5 ڀينس ڪالوني ۾ رات دير سان ڪئي وئي جتي پوليس ۽ هٿياربند جوابدارن وچ ۾ مبينا مقابلو ٿيو۔ پوليس جو چوڻ آهي ته شڪي ماڻهن کي روڪڻ جي ڪوشش ڪئي وئي ته جوابدارن فائرنگ شروع ڪري ڏني، جنهن تي پوليس جوابي ڪارروائي ڪئي۔فائرنگ جي ڏي وٺ دوران ٻه جوابدار زخمي ٿي پيا جن کي گرفتار ڪيو ويوگرفتار جوابدارن جي سڃاڻپ شاڪر ولد رحيم ۽ نظير ولد ابراهيم طور ٿي آهي۔ پوليس جوابدارن جي قبضي مان ٻه پستول ايمونيشن سميت، موبائل فون ۽ روڪ رقم برآمد ڪئي آهي۔ شروعاتي جاچ موجب گرفتار جوابدار مختلف اسٽريٽ ڪرائم وارداتن ۾ ملوث رهيا آهن۔ پوليس برآمد ٿيل هٿيار فرانزڪ جاچ لاءِ موڪلي ڇڏيا آهن، جڏهن ته زخمي جوابدارن کي طبي امداد لاءِ اسپتال منتقل ڪيو ويو آهي۔ٻي ڪارروائي ٿاڻو ميمڻ ڳوٺ جي حدن ۾ ڪئي وئي، جتي ڪجهه ڏينهن اڳ ملڪ شاپ تي هٿياربند ڦر دوران جوابدار لڳ ڀڳ 10 لک رپيا ڦري فرار ٿي ويا هئا۔پوليس خفيه اطلاع تي ڪارروائي ڪندي سرگرم ڌاڙيل گينگ جي ٻن جوابدارن کي گرفتار ڪري ورتو۔ گرفتار جوابدارن جي سڃاڻپ نظام الدين ۽ گلزار احمد طور ٿي آهي۔ پوليس موجب جوابدارن واردات کان پوءِ هڪ شهري کان هٿيارن جي زور تي 125 موٽر سائيڪل پڻ ڦري ورتي هئي۔گرفتار جوابدارن جي قبضي مان ٻه پستول ايمونيشن سميت، واردات دوران ڦريل 125 موٽر سائيڪل ۽ 11 موبائل فون برآمد ڪيا ويا آهن۔ پوليس موجب برآمد ٿيل موٽر سائيڪل ٿاڻي ميمڻ ڳوٺ جي حدن مان چوري ٿيل هئي۔پوليس اختيارين موجب گرفتار جوابدار نظام الدين عادي ڏوهاري آهي ۽ اڳ به گرفتار ٿي جيل وڃي چڪو آهي۔ ٻنهي جوابدارن جو ڪراچي شهر ۾ مختلف اسٽريٽ ڪرائم وارداتن ۾ ملوث هجڻ جو انڪشاف ٿيو آهي۔پوليس چئن ئي جوابدارن خلاف ڪيس داخل ڪري وڌيڪ جاچ شروع ڪري ڇڏي آهي، جڏهن ته سندن ٻين ساٿين جي ڳولا پڻ جاري آهي۔