ٺٽي ۾ يوسي گلمنڊه جي رهواسين جا يوسي چيئرمين تي ڪرپشن جا الزام

يوسي گلمنڊا جا رهواسي گل حسن جاکرو ۽ عاطف علي خاصخيلي پريس ڪلب پهچي ويا

ٺٽو( شفيق ڀٽي) عوامي پريس ڪلب ٺٽو ۾ يوسي گلمنڊه جي ووٽرن گل حسن جاکرو ۽ عاطف علي خاصخيلي پريس ڪانفرنس ڪندي الزام هنيو آهي ته يوسي چيئرمين پنهنجي علائقي ۾ ترقياتي ڪم ڪرائڻ بدران ماهوار ملندڙ بجٽ ذاتي استعمال هيٺ آڻي رهيو آهي. پريس ڪانفرنس دوران هنن چيو ته يوسي ۾ عوامي فلاح لاءِ ڪا به نمايان ترقي نظر نٿي اچي، جڏهن ته مبينا طور تي چيئرمين پنهنجي ڳوٺ ۾ ذاتي بنگلي جي تعمير شروع ڪرائي آهي، جيڪو سواليا نشان آهي. هنن وڌيڪ الزام هنيو ته ڪجهه سرٽيفڪيٽن جي جاري ڪرڻ تي في ٻار هزار روپيه ورتا وڃن ٿا، جنهن کي هو غريب عوام تي اضافي بوجھ قرار ڏين ٿا. مظاهري ڪندڙن جو چوڻ هو ته يوسي چيئرمين جو تعلق پيشه ورانه طور ٽريڪٽر ڊرائيور ۽ مستري جي شعبي سان آهي، ۽ سندس سياسي انتظامي تجربي جي کوٽ سبب علائقي ۾ عوامي مسئلا وڌي رهيا آهن. هنن لاڳاپيل اختيارين کان مطالبو ڪيو ته يوسي گلمنڊه جي ترقياتي بجٽ ۽ منصوبا شفاف طريقي سان جانچيا وڃن ۽ مبينا بي ضابطگين جي جاچ ڪري انصاف فراهم ڪيو وڃي. پريس ڪانفرنس ۾ هنن واضح ڪيو ته جيڪڏهن معاملي تي فوري ڪارروائي نه ڪئي وئي ته هو احتجاج جو دائرو وڌائيندا.