ملير: دمبا ڳوٺ ڀرسان واٽر پارڪ جي سوئمنگ پول ۾ نوجوان ٻڏي فوت

سوئمنگ پول ۾ وهنجڻ دوران 18ورهين جو عادل پٽ غلام شبير ٻڏي ويو

ملير (رپورٽ: عبدالرشيد مورجھريو) سپر هاءِ وي تي دمبا ڳوٺ ڀرسان قائم هڪ واٽر پارڪ جي سوئمنگ پول ۾ ٻڏي 18 ورهين جو نوجوان فوت ٿي ويو۔ واقعي کان پوءِ واٽر پارڪ ۾ موجود ماڻهن ۾ خوف ۽ هراس پکڙجي ويو، جڏهن ته انتظاميه ۽ موجود ماڻهن نوجوان کي پاڻي مان ڪڍي فوري طور اسپتال منتقل ڪيو، پر هو جانبر نه ٿي سگهيو ريسڪيو ذريعن موجب فوتي نوجوان جي سڃاڻپ عادل ولد غلام شبير، عمر 18 سال طور ٿي آهي۔ ٻڌايو پيو وڃي ته نوجوان سوئمنگ دوران اوچتو اونهي پاڻي ۾ هليو ويو ۽ ٻڏي ويو۔ واقعي کان پوءِ کيس فوري طور ايمبولينس ذريعي عباسي شهيد اسپتال منتقل ڪيو ويو، جتي ڊاڪٽرن جاچ بعد سندس فوت ٿيڻ جي تصديق ڪئي۔ذريعن موجب نوجوان پنهنجن دوستن سان گڏ تفريح لاءِ واٽر پارڪ آيو هو، جتي هي افسوسناڪ واقعو پيش آيو۔ واقعي جي اطلاع ملڻ تي پوليس پڻ اسپتال پهتي ۽ ضروري ڪارروائي شروع ڪئي وئي۔پوليس موجب واقعي جي وڌيڪ جاچ جاري آهي، جڏهن ته واٽر پارڪ ۾ حفاظتي انتظامن ۽ لائف گارڊ جي موجودگي بابت پڻ معلومات گڏ ڪئي پئي وڃي۔ فوتي نوجوان جو لاش قانوني ڪارروائي مڪمل ٿيڻ بعد وارثن حوالي ڪيو ويندو، جڏهن ته واقعي بعد گهر ۾ ماتم جو ماحول ڇانئجي ويو آهي۔