ڀينس ڪالوني ۾ ڏينهن ڏٺي مال جي واڙي جي گيٽ تي هٿياربند جوابدارن جي فائرنگ، واپاري کان 5 لک رپيا ڦر، هڪ شخص سخت زخمي

ملير (رپورٽ: عبدالرشيد مورجھريو) ڀينس ڪالوني روڊ نمبر 06 گجر چوڪ ويجهو ڏينهن ڏٺي هٿياربند جوابدارن مال جي پاڙي جي مرڪزي گيٽ تي ڇتي فائرنگ ڪري واپاري کان 5 لک رپيا ڦر ڪري فرار ٿي ويا، جڏهن ته فائرنگ جي نتيجي ۾ هڪ شخص سخت زخمي ٿي پيو، واقعي بعد علائقي ۾ خوف ۽ هراس پکڙجي ويو۔پوليس ۽ ذريعن موجب واقعو ڀينس ڪالوني ۾ شاڪر عمر گجر جي واڙي جي گيٽ تي پيش آيو، جتي نامعلوم هٿياربند جوابدار اوچتو پهچي لڳ ڀڳ 25 فائر ڪيا۔ فائرنگ سبب فارم تي موجود ماڻهن ۾ خوف پکڙجي ويو ۽ ڪيترائي ماڻهو پنهنجي جان بچائڻ لاءِ لڪي ويا۔ ذريعن موجب جوابدارن فائرنگ کانپوءِ واڙي تي موجود واپاري ماسٽر عبدالرسول کان 5 لک رپيا روڪ قم ڦر ڪري فرار ٿي ويا۔ فائرنگ دوران عبدالرسول ولد محمد امين، عمر 48 سال، سخت زخمي ٿي پيو۔اطلاع ملڻ تي رضاڪارن موقعي تي پهتي ۽ زخمي کي فوري طور جناح اسپتال منتقل ڪيو جتي کيس طبي امداد ڏني پئي وڃي۔ واقعي جي اطلاع ملڻ بعد پوليس به موقعي تي پهچي وئي، جتي پوليس واقعي واري هنڌ جو جائزو وٺي ثبوت گڏ ڪيا۔پوليس جوابدارن جي ڳولا لاءِ ڀرپاسي وارن علائقن ۾ ناڪابندي پڻ ڪري ڇڏي آهي ۽ وڌيڪ جاچ جاري آهي۔پوليس عملدارن جو چوڻ آهي ته واردات ۾ ملوث جوابدارن کي جلد گرفتار ڪيو ويندو، جڏهن ته علائقي ۾ سيڪيورٽي وڌيڪ سخت ڪرڻ لاءِ قدم کنيا پيا وڃن۔ واقعي بعد علائقي واسين ۽ فارم مالڪن وڌندڙ وارداتن تي ڳڻتي ظاهر ڪندي پوليس کان فوري ۽ اثرائتي ڪارروائي جو مطالبو ڪيو آهي۔