ملير: نوجوان کي تشدد ڪري قتل ڪرڻ بعد لاش سارڻ واري واقعي ۾ نوان انڪشاف

مقتول عثمان ڳجهي شادي ڪئي هئي، کيس ٻار هئا جيڪي امڙ سميت گم آهن: پوليس ذريعا

ملير (رپورٽ: عبدالرشيد مورجھريو) لانڍي شيرپاؤ ڪالوني جي رهواسي 32 ورهين جي عثمان جي تشدد ڪيل ۽ تيزاب سان ساڙيل لاش واري ڪيس ۾ جاچ دوران اهم ۽ پراسرار انڪشاف سامهون آيا آهن۔ جاچ ڪندڙ اختيارين موجب مقتول عثمان ڳجهي شادي ڪئي هئي، جنهن مان کيس ٻار پڻ آهن، پر سندس زال ۽ ٻار اڃا تائين لاپتا آهن ۽ سندن ڪو به پتو نه پئجي سگهيو آهي۔ اختيارين موجب مقتول عثمان 29 مارچ تي گاڏي بڪنگ تي نڪتو هو، جنهن کانپوءِ هو پراسرار نموني گم ٿي ويو۔ بعد ۾ سندس لاش نوري آباد ڀرسان بي دردي سان قتل ٿيل حالت ۾ مليو، جتي سندس چهرو تيزاب سان ساڙيل هو ته جيئن سڃاڻپ مشڪل بڻائي سگهجي۔پوليس موجب مقتول کي پهرين بدترين تشدد جو نشانو بڻايو ويو، جنهن بعد کيس گوليون هڻي قتل ڪيو ويو۔واقعي واري هنڌ تان پستول جا خول پڻ هٿ آيا، جنهن مان ظاهر ٿئي ٿو ته قتل رٿابندي تحت ڪيو ويو۔ جاچ اختيارين موجب ڪيس ۾ ان وقت پراسرار موڙ آيو جڏهن جاچ دوران معلوم ٿيو ته مقتول ڳجهي شادي ڪئي هئي ۽ کيس ٻار به هئا، جڏهن ته سندس زال ۽ ٻار پڻ پراسرار نموني لاپتا آهن، جنهن سبب ڪيس وڌيڪ ڳنڀير ٿي ويو آهي۔پوليس موجب سي سي ٽي وي فوٽيج ۾ مقتول جي گاڏي ٽول پلازا تي ڏٺي وئي، جتي گاڏي مقتول بدران ڪو نامعلوم شخص هلائي رهيو هو۔ پوليس موجب هن فوٽيج بعد جاچ جو دائرو وڌيڪ وڌايو ويو آهي۔پوليس ڪيترائي ڏينهن گذرڻ باوجود نه مقتول جي گاڏي هٿ ڪري سگهي آهي ۽ نه ئي سفاک جوابدارن کي گرفتار ڪري سگهي آهي، جڏهن ته جاچ جاري آهي ۽ مختلف پهلوئن کان تحقيق ڪئي پئي وڃي۔