عمرڪوٽ: ڌناسر واقعي جو رخ تبديل، ڪيلاش ڪولھي سامهون اچي ويو

اغوا ۽ قتل جو خدشو ظاهر ڪيل ڌنار ڪيلاش ڪولهي کي پوليس حوالي ڪيو ويو

عمرڪوٽ (ڊ ، ر) عمرڪوٽ ڀرسان ڳوٺ ڌناسر ۾ ڪيلاش ڪولھي جي مبينا اغوا ۽ قتل واري ڪيس جو رخ اوچتو تبديل ٿي ويو آهي، جنهن بعد ابتدائي طور لڳايل الزامن تي ڪيترائي سوال اڀري آيا آهن، خبر موجب گذريل ڏينهن ڪيلاش ڪولھي جي گمشدگي بعد ڪولھي برادري طرفان مھر برادري تي سنگين اغوا ۽ قتل جا الزام لڳايا ويا ۽ احتجاج ڪندي مين روڊ بلاڪ ڪري ڌرڻو هنيو ويو، جنهن سبب ٽريفڪ جي رواني سخت متاثر ٿي ۽ عام شهري پريشاني جو شڪار بڻيا، بعد ۾ رات دير سان نوجوان ڪيلاش ڪولھي پاڻ ظاهر ٿي پوليس حوالي ڪيو ويو، پنهنجي بيان ۾ هن ٻڌايو ته هو گاھ ڪرڻ لاءِ ويو هو، جتي ڪجهه ماڻهن ساڻس جهيڙو ڪيو، پر هو اتان بچي نڪري ويو ۽ ويجهو هڪ واٽر موري هيٺ لڪي ويو، جتان ڪجهه وقت گذارڻ بعد واپس گهر پهتو، واقعي کان پوءِ مھر برادري پاران پريس ڪلب عمرڪوٽ آڏو احتجاجي مظاهرو ڪيو ويو، مظاهري جي اڳواڻي مھر الدين مھر، عبدالستار مھر، يوسي چيئرمين محمد عارف مھر، محمد بخش مھر، وارث مھر، دلبر مھر، الهبچش مھر، فقير محب منگريو ۽ ٻين ڪئي، ان موقعي تي اڳواڻن سخت ردعمل ظاهر ڪندي چيو ته کين بنا تصديق جي ڪوڙن ۽ من گهڙت ڪيسن ۾ ڦاسائڻ جي ڪوشش ڪئي وئي ۽ سندن ساک کي نقصان پهچايو ويو، هنن دعويٰ ڪئي ته ڪيلاش ڪولھي سندن زمين تي مشين چوري ڪرڻ آيو هو ۽ سڏ ڪرڻ تي فرار ٿي ويو، جڏهن ته بعد ۾ کيس غائب ڪري اغوا ۽ قتل جو ڪوڙو ڊرامو رچايو ويو، مھر برادري جي اڳواڻن وڌيڪَ الزام لڳايو ته ڪجهه اقليتي ڪامريڊن ذاتي مفادن خاطر ڪولھي برادري جي ماڻهن کي استعمال ڪندي صورتحال کي تڪراري بڻايو، جنهن سان نه رڳو بي بنياد الزام لڳا پر مھر برادري جي ساک کي به نقصان پهچايو ويو، مھر برادري موجب نوجوان جي سامهون آيل بيان سندن موقف جي تصديق ڪري ٿو، اڳواڻن آءِ جي سنڌ، ڊي آءِ جي ميرپورخاص ۽ ايس ايس پي عمرڪوٽ کان مطالبو ڪيو آهي ته واقعي جي شفاف انڪوائري ڪرائي وڃي ۽ ڪوڙا الزام لڳائيندڙ عنصرن خلاف قانون موجب سخت ڪاروائي ڪئي وڃي، واضح رهي ته واقعي جي شروعاتي مرحلي ۾ لڳايل سنگين الزامن، روڊ بلاڪ ٿيڻ ۽ پوءِ صورتحال جي اوچتي تبديلي سبب علائقي ۾ بيچيني پيدا ٿي، جڏهن ته سماجي حلقن موجب اهڙن حساس معاملن ۾ بنا تصديق خبرن جي ڦهلاءَ سان بيگناهه ماڻهن جي ڪردار ڪشي ٿيڻ جو خدشو وڌي وڃي ٿو.