سنڌي اديبن ۽ دانشورن پاران ماڻڪ ڪنگراڻي جي ڪهاڻين کي اسٽيج ناٽڪ ذريعي عوام آڏو آڻڻ جو مطالبو

ماڻڪ جي جواني ۾ ٿيل وڇوڙي سبب سنڌ جي ادب ۽ آرٽ جو تمام وڏو نقصان ٿيو، اسان لاءِ يقين ڪرڻ ڏکيو آهي ته ماڻڪ هاڻ ناهي: مقرر

حيدرآباد(بيورو رپورٽ) نامياري ڪهاڻيڪار، ناٽڪ نويس ۽ صحافي ماڻڪ ڪنگراڻي جي پھرئين ورسي کي خطاب ڪندي سنڌ جي اديبن، دانشورن ۽ ليکڪن گهر ڪئي ته ماڻڪ ڪنگراڻي جي ڪهاڻين کي اسٽيج ناٽڪ ذريعي عوام آڏو پيش ڪيو وڃي، هنن چيو ته ماڻڪ ڪنگراڻي جي جواني ۾ ٿيل وڇوڙي سبب سنڌ جي ادب ۽ آرٽ جو تمام وڏو نقصان ٿيو، هن کي اڃا گهڻو ڪجهه ڪرڻو هو، اسان لاءِ يقين ڪرڻ ڏکيو آهي ته ماڻڪ هاڻ ناهي رهيو، پر ان جو ادبي پورهيو کيس هميشه لاءِ زنده جاويد رکندو. اهڙن خيالن جو اظهار ڇنڇر ڏينھن 11 اپريل تي ميلوحا آرٽ سرڪل پاران نامياري ڪهاڻيڪار، ناٽڪ نويس ۽ صحافي ماڻڪ ڪنگراڻي جي “سنڌي لئنگئويج اٿارٽي” حيدرآباد ۾ ملهايل پهرين ورسي واري تقريب کي خطاب ڪندي ناميارن ليکڪن ۽ اديبن ليکڪ عزيز گوپانگ. تاج جويو. عزيز ڪنگراڻي، ڊاڪٽر حميد سومرو، ايوب گل ستار سروهي، علي زاهد، شفيع چانڊيو، سليم چنا، محمد موسيٰ رند، حميرا شمس شيخ، خان محمد جروار ۽ ٻين چيو ته ماڻڪ ڪنگراڻي پنهنجي سڄي زندگي ادب کي وقف ڪري ڇڏي سندس لکڻين ۾ سماج جي دردن جي عڪاسي ٿيل آهي. هو هڪ وڏو ڪهاڻيڪار. ناٽڪ نويس ۽ بهترين صحافي هو. هو پنهنجين لکڻين ۾ ڌرتي ۽ مسڪين ماڻهن جو ڪيس وڙهندو رهيو. هنن چيو ته ماڻڪ سنڌي ٻولي جي واڌ ويجهه لاءِ وڏو ڪم ڪيو. جيڪو سدائين ياد رکيو ويندو. هو مسڪينن جي پاسي بيهي لکڻين ذريعي ظالمن سان مهاڏو اٽڪائيندو رهيو. سندس دل ۾ مسڪين ماڻهن جو درد سمايل هو. هنن چيو ته ماڻڪ جون لکڻيون سنڌ جي تاريخ ۾ سدائين سمايل رهنديون. هو هڪ وڏو ليکڪ ۽ ناٽڪ ويس هو. سندس وڇوڙي کان پوءِ ادبي دنيا ۾ پيدا ٿيل خال ڀرجي نه سگهندو. هو سنڌ جي ماڻهن جي دلين ۾ سدائين ياد رهندو. جڏهن ته ماڻڪ ڪنگراڻي جي ڪهاڻين جي ڪتاب "سرء جو ڇڻيل پن" جو مهورت پڻ ڪيو ويو.