ملير مھاڻن لاءِ تيل معاوضو ڏيڻ جو مطالبو، فشرمين اڳواڻن ۽ ايم پي اي شازيه ڪريم سنگهار جي ملاقات

فاطمه مجيد سان ايم پي اي شازيه ڪريم سنگهار جي ملاقات، اياز علي، ناصر بونيري ۽ ٻيا به موجود

ملير (رپورٽ: عبدالرشيد مورجھريو) فشرمينز ڪوآپريٽو سوسائٽي لميٽيڊ جي چيئرپرسن فاطمه مجيد سان سنڌ اسيمبلي جي ميمبر شازيه ڪريم سنگھار سندس آفيس ۾ ملاقات ڪئي، جتي وڌندڙ تيل جي قيمتن ۽ ان جي اثرن بابت تفصيلي ڳالھ ٻولھ ڪئي وئي۔ملاقات دوران ان ڳالهه تي زور ڏنو ويو ته سمنڊ مان ملڪ لاءِ قيمتي پرڏيهي ناڻو ڪمائيندڙ مھاڻن کي به ٻين شعبن جيان رليف ۽ سبسڊي فراهم ڪئي وڃي۔ ان موقعي تي محترمه فاطمه مجيد چيو ته تيل جي وڌندڙ قيمتن مھاڻن جي مسئلن ۾ وڌيڪ اضافو ڪري ڇڏيو آهي، تنهن ڪري جيئن موٽر سائيڪل سوارن، ٽرانسپورٽرن ۽ هارين لاءِ رليف پيڪيج ڏنا ويا آهن، تيئن مھاڻن لاءِ به فوري طور رليف جو اعلان ڪيو وڃي۔ان موقعي تي ايف سي ايس ايل جي مينيجر اياز علي چيو ته تيل ڊيزل جي قيمتن ۾ واڌ سبب مھاڻن جو ڪاروبار سخت متاثر ٿيو آهي، ان ڪري حڪومت فوري تيل جي مڌ ۾ کين معاوضو فراهم ڪري ته جيئن هو پنهنجو روزگار جاري رکي سگهن۔ هن وڌيڪ چيو ته مھاڻن جون ٻيڙيون مڪمل طور تي تيل ۽ ڊيزل تي دارومدار رکن ٿيون ملاقات ۾ لال بخش ڊائريڪٽر ايف سي ايس ايل، ناصر بونيري مينيجر مارڪيٽ، اسد علي هنگورو سيڪريٽري بورڊ، جھانگير خان ميڊيا آفيسر، نادر بونيري انچارج مينٽيننس سميت ٻيا آفيسر پڻ موجود هئا..