جماعت اسلامي پاران گلشن حديد ۾ پاڻي کوٽ ۽ بنيادي سهولتن جي کوٽ خلاف تحريڪ جو اعلان

گلشن حديد گذريل هڪ سال کان پاڻي جي شديد کوٽ جو شڪار آهي: ملڪ عزيز الرحمان ۽ ٻيا

ملير (رپورٽ: عبدالرشيد مورجھريو) جماعت اسلامي پاڪستان طرفان گلشن حديد ۾ پاڻي جي بندش، ڦرن ۽ رهزني جي وڌندڙ واقعن ۽ بنيادي سهولتن جي کوٽ خلاف عوامي پريس ڪانفرنس ڪئي وئي۔ پريس ڪانفرنس کي ملڪ عزيز الرحمان، حمزه رمضان ۽ اڳوڻي يوسي ناظم گلشن حديد محمد اسلام خطاب ڪيو۔ اڳواڻن چيو ته گلشن حديد گذريل هڪ سال کان پاڻي جي شديد کوٽ جو شڪار آهي، پر پاڪستان پيپلز پارٽي طرفان عوام کي ڪنهن به قسم جو رليف ڏيڻ لاءِ سنجيده قدم نه کنيا ويا آهن۔ هنن چيو ته پهريان 6 ڪروڙ ۽ پوءِ 50 ڪروڙ روپين جو منصوبو پيش ڪيو ويو، پر 6 ڪروڙ وانگر 50 ڪروڙ وارو منصوبو به ناڪام ٿيندو نظر اچي رهيو آهي۔ محمد اسلام چيو ته جماعت اسلامي شروعات ۾ ئي هن منصوبي بابت خدشا ظاهر ڪيا هئا، بعد ۾ ميئر ڪراچي به 6 ڪروڙ روپين جي ضايع ٿيڻ جو اعتراف ڪيو۔ هنن الزام لڳايو ته بدانتظامي ۽ بدديانتي سبب عوام جا ڪروڙين رپيا ضايع ڪيا ويا آهن۔ هن وڌيڪ چيو ته جماعت اسلامي گهٽ لاڳت ۾ منصوبو مڪمل ڪرڻ جي تجويز به ڏني هئي، پر ان کي نظرانداز ڪيو ويو۔اڳواڻن وڌيڪ چيو ته گلشن حديد جي مرڪزي نالي جي کوٽائي به بدانتظامي جو مثال آهي، جيڪڏهن اها رقم گهٽين ۽ رستن جي تعمير تي خرچ ڪئي وڃي ها ته عوام کي وڌيڪ فائدو ٿئي ها۔ هنن چيو ته برساتي نالي کي سيوريج لائن ۾ تبديل ڪيو ويو ۽ ان جو سائيز به ننڍو ڪيو ويو، جنهن سبب مسئلا وڌيڪ وڌي ويا آهن۔اڳواڻن چيو ته اسٽيل مل انتظاميا سان معاهدو ڪيو وڃي ته هڪ ڏينهن ۾ گلشن حديد کي پاڻي فراهم ٿي سگهي ٿو، پر پيپلز پارٽي ايم او يو تي صحيح ڪرڻ لاءِ تيار ناهي، جنهن مان بدانتظامي ظاهر ٿئي ٿي۔ جماعت اسلامي اڳواڻن اعلان ڪيو ته هو ٻيهر احتجاجي تحريڪ شروع ڪندا، هر آچر تي گلشن حديد ۾ احتجاجي ويهڪ منعقد ڪئي ويندي ۽ عوام سان گڏجي پاڻي ۽ ٻين بنيادي مسئلن جي حل تائين جدوجهد جاري رکي ويندي۔ هنن چيو ته عوام کي روڊن تي آندو ويندو ۽ ذميوارن کان پائي پائي جو حساب ورتو ويندو۔