ملير پوليس جون 2وڏيون ڪارروائيون، هڪ زخمي سميت 2 ڏوهاري گرفتار ڪرڻ جي دعويٰ

ملير (رپورٽ: عبدالرشيد مورجھريو) ملير ضلعي ۾ پوليس مختلف ڪارروائين دوران منشيات فروش کي گرفتار ڪري وڏي مقدار ۾ چرس هٿ ڪري ورتو، جڏهن ته قائدآباد جي علائقي ۾ موٽر سائيڪل چوري ڪندڙ گينگ سان مقابلي دوران هڪ جوابدار زخمي حالت ۾ گرفتار ڪيو ويو آهي۔ پوليس موجب شاهه لطيف پوليس ڳجهي اطلاع تي ٿانه شاهه لطيف جي حد ڪوهي ڳوٺ ۾ ڪارروائي ڪئي، جتي هڪ جوابدار کي گرفتار ڪري سندس قبضي مان 2150 گرام اعليٰ معيار جي چرس ۽ وڪري جي رقم هٿ ڪئي وئي۔ گرفتار جوابدار جي سڃاڻپ حماد جي نالي سان ٿي آهي، جيڪو پنهنجي ساٿين سان گڏ مختلف علائقن ۾ منشيات وڪرو ڪندو هو۔ پوليس موجب جوابدار جو ڪرمنل رڪارڊ پڻ چيڪ ڪيو پيو وڃي، جڏهن ته سندس خلاف ڪيس داخل ڪري وڌيڪ جاچ شروع ڪئي وئي آهي۔ ٻئي طرف قائدآباد پوليس قائدآباد ٿاڻي جي حد ريڙهي روڊ احسان گرائونڊ لانڍي وٽ موٽر سائيڪل چوري ڪندڙ گينگ خلاف ڪارروائي ڪئي۔ ان دوران پوليس ۽ جوابدارن وچ ۾ فائرنگ جو ڏي وٺ ٿي جنهن جي نتيجي ۾ هڪ جوابدار زخمي حالت ۾ گرفتار ڪيو ويو جڏهن ته سندس ساٿي فائرنگ ڪندو فرار ٿيڻ ۾ ڪامياب ٿي ويو۔پوليس موجب گرفتار زخمي جوابدار جي سڃاڻپ گل بادشاه ولد سخيپ شاه جي نالي سان ٿي آهي، جيڪو موٽر سائيڪل چوري جي ڪيترين ئي وارداتن ۾ گهربل هو۔ پوليس جوابدار وٽان هڪ عدد غيرقانوني 9 ايم ايم پستول، ايمونيشن، نقد رقم ۽ هڪ موٽر سائيڪل پڻ هٿ ڪري ورتي۔پوليس موجب زخمي جوابدار کي فوري طبي امداد لاءِ اسپتال منتقل ڪيو ويو آهي، جڏهن ته هٿ آيل هٿيار فرانزڪ جاچ لاءِ موڪليو ويندو۔ گرفتار جوابدار جو ڪرمنل رڪارڊ جديد سرچ ڊيوائس ذريعي چيڪ ڪيو پيو وڃي، جڏهن ته فرار ٿيل جوابدار جي ڳولا جاري آهي۔