رهواسين ۽ سياسي سماجي اڳواڻن پاران الله رکيو چوڪ تي احتجاج ڪيو، عورتن جو به وڏو انگ موجود
ڪراچي (اعجاز چانڊيو)ڪراچي جي نور محمد ڳوٺ جي رهواسين عدالتي حڪمن تحت گهرن جي ممڪن ڊاهڻ جي خلاف الله رکيو چوڪ تي احتجاجي مظاھرو ڪري ڌرڻو ھڻي ويھي رھيا. احتجاج ۾ مردن ۽ عورتن جي وڏي انگ شرڪت ڪئي. مظاهري جي اڳواڻي نور خان برفت ۽ ٻين مقامي اڳواڻن ڪئي. ان موقعي تي مختلف سياسي ۽ سماجي شخصيتن ۽ مقامي معززين پڻ يڪجهتي جو اظهار ڪرڻ لاءِ احتجاجي ڪئمپ تي پهتا. انهن ۾ عوامي راج تحريڪ پاڪستان جي چيئرمين بئريسٽر سيد خليل احمد شاهه، محبوب رند، سنڌ نيشنل پارٽي جي سينئر وائيس چيئرمين رمضان بليدي، سنڌ ترقي پسند پارٽي ضلعي اولهه جي صدر رجب مگسي ۽ عوامي نيشنل پارٽي جي اسلام جان سميت ٻيا شامل هئا. احتجاجي ڪئمپ کي خطاب ڪندي اڳواڻن الزام لڳايو ته ڪراچي ۾ سنڌي آبادين کي ڊاهڻ ۽ پرڏيهين کي آباد ڪرڻ لاءِ هڪ منظم سازش استعمال ڪئي پئي وڃي. انهن چيو ته ماضي ۾ به هزارين گهرن تي مشتمل ڳوٺ ڊاهي اتي ٻيا ماڻهو آباد ڪيا ويا، جڏهن ته هڪ وڏو پارڪ پڻ ميئر ڪراچي مرتضيٰ وهاب جي نالي تي رکيو ويو آهي. اڳواڻن چيو ته ميئر ڪراچي مرتضيٰ وهاب کي عوام چونڊيو هو پر هاڻي هو ڳوٺن کي ڊاهڻ جي سازش ۾ شامل آهي. انهن وڌيڪ چيو ته هڪ طرف سنڌي آبادين کي ڊاهڻ جا حڪم جاري ڪيا پيا وڃن، جڏهن ته ٻئي طرف سرجاني ٽائون ۾ پلاٽ وڪرو ڪيا پيا وڃن. هڪ سوال جي جواب ۾ مظاهرين چيو ته عدالتن کي گمراهه ڪيو پيو وڃي ۽ اهو تاثر ڏنو پيو وڃي ته ڄاڻايل زمين خالي آهي يا اتي محدود آبادي آهي، جيتوڻيڪ نور محمد ڳوٺ ۾ پنج هزار کان وڌيڪ گهر آهن. انهن چيو ته انهن ڪيترائي ڀيرا عدالتن ۾ وڊيوز ۽ ثبوت پيش ڪيا آهن. مقررين چيو ته علائقي جا رهواسي گهڻو ڪري غريب ماڻهو آهن جيڪي روزاني اجرت تي ڪم ڪن ٿا ۽ جيڪڏهن انهن کي بي گهر ڪيو ويو ته انهن وٽ ڪٿي به وڃڻ لاءِ نه هوندو. انهن خبردار ڪيو ته جيڪڏهن نور محمد ڳوٺ کي ڊاهڻ جي ڪوشش ڪئي وئي ته سخت مزاحمت ڪئي ويندي ۽ سپر هاءِ وي تي ڌرڻو هڻي روڊ بلاڪ ڪيا ويندا. مظاهرين مطالبو ڪيو ته بلڊر مافيا جي دٻاءُ هيٺ ڪيل ڪارروائي کي فوري طور تي بند ڪيو وڃي.
0 تبصرے