گڏاپ پوليس پاران مئل جانور جو گوشت وڪرو ڪرڻ جي الزام هيٺ هڪ ڄڻو سوگهو

سپر هاءِ وي جي حدن اندر ڪارروائي ڪري ڪاشف علي پٽ مظفر علي کي گرفتار ڪري ورتو: پوليس

ملير (رپورٽ: عبدالرشيد مورجھريو) گڏاپ سٽي پوليس ڳجهي اطلاع تي ڪارروائي ڪندي صحت لاءِ هاڃيڪار مئل جانور جو گوشت وڪرو ڪندڙ جوابدار کي گرفتار ڪري ورتو آهي۔پوليس موجب ڪارروائي سپر هاءِ وي جي حدن اندر ڪئي وئي، جتي ڇاپا هڻي جوابدار کي سوگهو ڪيو ويو گرفتار جوابدار جي سڃاڻپ ڪاشف علي ولد مظفر علي جي نالي سان ٿي آهي۔پوليس جوابدار جي قبضي مان مئل جانور جو گوشت هٿ ڪري ورتو، جڏهن ته سپلائي ۾ استعمال ٿيندڙ سوزوڪي گاڏي کي پڻ تحويل ۾ ورتو ويو آهي۔ ابتدائي جاچ موجب جوابدار مئل جانور جو گوشت مختلف هوٽلن ۽ دڪانن تي وڪرو ڪندو هو، جنهن سبب شهرين جي صحت کي سخت خطرا لاحق هئا۔پوليس اختيارين موجب گرفتار جوابدار جو ڪرمنل رڪارڊ پڻ چيڪ ڪيو پيو وڃي، جڏهن ته سندس نيٽ ورڪ بابت وڌيڪ جاچ جاري آهي۔گڏاپ سٽي پوليس جوابدار خلاف مقدمو داخل ڪري وڌيڪ جاچ شروع ڪري ڇڏي آهي۔ پوليس جو چوڻ آهي ته شهرين جي صحت سان کيڏندڙ ماڻهن خلاف سخت ڪارروائيون جاري رهنديون۔