ڊي سي ٺٽو سرمد علي ڀاڳت جي صدارت هيٺ بلڊ ڊونيشن مهم بابت اجلاس

ٿليسميا ۾ مبتلا ٻار سماج جي خاص توجه جا مستحق آهن: ڊي سي سرمد علي ڀاڳت

ٺٽو(محمد شفيق ڀٽي)ڊپٽي ڪمشنر ٺٽو سرمد علي ڀاگت جي صدارت هيٺ ٿليسميا جي مريضن لاءِ بلڊ ڊونيشن مهم بابت هڪ اهم اجلاس منعقد ٿيو۔ اجلاس کي خطاب ڪندي ڊپٽي ڪمشنر سرمد علي ڀاگت چيو ته ٿليسميا ۾ مبتلا ٻار سماج جي خاص توجه جا مستحق آهن ۽ انهن لاءِ باقاعده رت جي فراهمي زندگي ۽ موت جو مسئلو آهي۔ هن چيو ته هڪ صحتمند سماج اهو هوندو آهي جتي ڪمزور ۽ بيمار ماڻهن جو خيال رکيو وڃي، ۽ رت جو عطيو ڏيڻ هڪ عظيم انساني خدمت آهي جيڪا ڪيترين ئي زندگين کي بچائڻ جو سبب بڻجي ٿي۔ هن وڌيڪ چيو ته ٿليسميا جي مريض ٻارن ۽ انهن جي والدين کي هڪ بلڊ بيگ لاءِ به پريشاني کي منهن ڏيڻو پوي ٿو، جيڪو انتهائي فڪر جوڳي ڳالهه آهي۔ اسان جي ڪوشش آهي ته اهڙو مربوط نظام قائم ڪيو وڃي، جنهن تحت انهن ٻارن کي وقت سر ۽ مستقل بنيادن تي رت جي فراهمي ممڪن بڻائي سگهجي۔ ڊپٽي ڪمشنر ٻڌايو ته ان مقصد لاءِ هڪ مؤثر مانيٽرنگ نظام تيار ڪيو پيو وڃي، جنهن تحت گڏ ٿيندڙ بلڊ بيگز مطابق ٿليسميا جي مريضن لاءِ ڪوٽا مقرر ڪيو ويندو، جيئن متاثر ٻارن ۽ انهن جي والدين کي پيش ايندڙ مشڪلاتن ۾ گهٽتائي آڻي سگهجي۔ هن واضح ڪيو ته هن نظام تحت گڏ ٿيندڙ رت صرف ٿليسميا جي مريضن لاءِ مخصوص هوندو۔ هن وڌيڪ چيو ته بلڊ ڊونيشن مهم کي ڪامياب بڻائڻ لاءِ پوليس، صحت، تعليم ۽ ٻين سڀني ادارن کان تعاون حاصل ڪيو پيو وڃي ته جيئن وڌ کان وڌ رت جا عطيا گڏ ڪيا وڃن۔ ڊپٽي ڪمشنر چيو ته پير 6 اپريل کان هڪ هفتي تائين روزانو صبح 10 وڳي کان شام 4 وڳي تائين سول اسپتال مڪلي ۾ بلڊ ڊونيشن وارڊ قائم ڪيو ويندو، جتي شهرين کان رت جا عطيا وصول ڪيا ويندا۔ هن ميڊيا، سول سوسائٽي ۽ عام ماڻهن کي اپيل ڪئي ته هو هن انسان دوست مهم ۾ وڌي چڙهي حصو وٺن ۽ رت جي عطين بابت آگاهي ڦهلائن ته جيئن وڌيڪ کان وڌيڪ قيمتي انساني زندگيون بچائي سگهجن۔ ان موقعي تي شرڪت ڪندڙن بلڊ ڊونيشن بابت مختلف تجويزون ۽ رايا پيش ڪيا، جڏهن ته سڀني ڀرپور تعاون جي يقين دهاني پڻ ڪرائي۔ اجلاس ۾ پوليس، صحت، روينيو، تعليم، بار ايسوسيئيشن، صحافين، اين جي اوز، ميونسپل ۽ ٽائون آفيسرن، پرائيويٽ اسڪولن، هيومن رائٽس ڪميشن، مرف، پي پي ايڇ آءِ ۽ سول سوسائٽي جي نمائندن سميت مختلف کاتن جي آفيسرن شرڪت ڪئي۔