ابراهيم حيدري ٽائون جي علائقي ڀينس ڪالوني گندگي جا ڍير

روڊن تي پاڻياٺي ڇيڻي جي موجودگي ۽ بدترين سيوريج سبب عوام پريشان

ملير (رپورٽ: عبدالرشيد مورجھريو) ابراهيم حيدري ٽائون ملير ۾ واقع ڀينس ڪالوني ۾ روڊن تي پاڻياٺي ڇيڻي جي موجودگي ۽ بدترين سيوريج صورتحال علائقي واسين ۽ ڊيري فارمرز جي زندگي عذاب بڻائي ڇڏي آهي، جڏهن ته شهرين انتظامي نااهلي ۽ سياسي اختلافن کي هن بحران جو بنيادي سبب قرار ڏنو آهي۔ علائقي واسين موجب روڊن تي ڇيڻي جا ڍڳ ۽ گندگي جا انبار صاف نظر اچي رهيا آهن، جيڪي نه رڳو ماحولياتي آلودگي جو سبب بڻجي رهيا آهن پر شهرين لاءِ صحت جا سنگين خطرا پڻ پيدا ڪري رهيا آهن۔مقامي ماڻهن جو چوڻ آهي ته هن مسئلي بابت ڪيترائي ڀيرا پاڪستان پيپلز پارٽي جي مقامي ذميوارن سان رابطو ڪيو ويو، پر هر ڀيري اهو چيو ويو ته ٽائون چيئرمين ڪم ڪرڻ نٿو ڏئي۔ شهرين سوال اٿاريو آهي ته يو سي ۽ ٽائون انتظاميا وچ ۾ هي اختلاف آخر ڪهڙي بنياد تي آهي ڇا هي تڪرار عوامي خدمت لاءِ آهي يا فنڊن جي ورڇ، ڪرپشن ۽ ذاتي مفاد ان جي پويان آهن علائقي واسين موجب هنن انهيءَ اميد تي ووٽ ڏنو هو ته جڏهن صوبائي حڪومت، بلدياتي قيادت ۽ اختيار هڪ ئي جماعت وٽ هوندا ته ترقياتي ڪم تيزي سان ٿيندا، پر ان جي ابتڙ صورتحال وڌيڪ خراب ٿي وئي آهي ۽ مسئلا وڌي رهيا آهن۔شهرين جو چوڻ آهي ته اختيارن جي مرڪزي ٿيڻ ۽ سياسي مقابلي جي کوٽ سبب احتساب جو عمل ڪمزور ٿي ويو آهي، جنهن ڪري ترقياتي ڪمن بدران انتظامي بدحالي ۽ نااهلي سامهون اچي رهي آهي۔علائقي واسين اختيارين کان مطالبو ڪيو آهي ته ٽائون ۽ يو سي وچ ۾ تڪرار کي فوري طور ختم ڪري عملي قدم کنيا وڃن ۽ ڀينس ڪالوني ۾ صفائي، سيوريج ۽ ٻين بنيادي مسئلن کي ترجيحي بنيادن تي حل ڪيو وڃي، ٻي صورت ۾ عوام احتجاج تي مجبور ٿي سگهي ٿو۔