عمرڪوٽ ۾ پسند جو شادي ڪندڙ جوڙي جو تحفظ لاءِ احتجاج

مرضي سان ڪامل سان پرڻو ڪيو آهي، حياتي کي خطرو آهي: عظمت لاشاري

عمرڪوٽ (ڊ ر) ڳوٺ مصري خان، ضلعي نوشهرو فيروز سان تعلق رکندڙ نوجوان ناري عظمت ڌيءُ غلام محمد لاشاري عمرڪوٽ جي رهواسي نوجوان ڪامل ولد محمد عثمان سان پسند جي شادي ڪري ورتي آهي، شادي بعد جوڙو عمرڪوٽ پريس ڪلب پهچي ميڊيا آڏو دانهن ڏيندي تحفظ فراهم ڪرڻ جي اپيل ڪئي آهي، جوڙي موجب سندن شادي باهمي رضا مندي سان ٿي آهي، پر ڇوڪري جي مائٽن طرفان سخت ڌمڪيون ڏنيون پيون وڃن، ناري عظمت الزام هنيو ته سندس ڀاءُ محبوب علي ولد غلام محمد لاشاري ۽ ٻين مائٽن، جن ۾ چاچو ناظم ۽ مختيار شامل آهن، کين جان کان مارڻ جون ڌمڪيون ڏئي رهيا آهن، جوڙي چيو ته اسان ٻئي بالغ آهيون ۽ پنهنجي مرضي سان شادي ڪئي آهي، تنهنڪري اسان کي قانوني تحفظ ڏنو وڃي، هنن اعليٰ اختيارين کان اپيل ڪئي ته معاملي جو نوٽس وٺي کين تحفظ ۽ انصاف فراهم ڪيو وڃي، پسند جو پرڻو ڪندڙ جوڙي وڌيڪَ چيو ته جيڪڏهن کين ڪنهن به قسم جو نقصان پهتو ته ان جا ذميوار ڌمڪيون ڏيندڙ ڌريون هونديون.