گلشن حديد مان ڇھين ڪلاس جي شاگردياڻي مبينا اغوا، وارثن جو اسٽيل ٽائون ٿاڻي اڳيان ڌرڻو

اڌ ڪلاڪ لاءِ به نياڻي طيبه گهر کان ٻاهر هجي ته پريشان ٿي ويندا هئاسين پر هاڻي ٽن ڏينهن کان گم آهي: آغا وحيد پٺاڻ

ملير (رپورٽ: عبدالرشيد مورجھريو) گلشن حديد مان ڇھين ڪلاس جي شاگردياڻي طيبہ مبينا طور تي اغوا ٿيڻ بعد ٽي ڏينهن گذرڻ باوجود لاپتہ آهي. هن واقعي خلاف وارثن ۽ علائقي جي رهواسين اسٽيل ٽائون پوليس ٿاڻي اڳيان احتجاجي مظاهرو ڪيو ۽ ڌرڻو هنيو. مظاهرو ڪندڙن نينگري کي فوراً بازياب ڪرائڻ جي گهر ڪئي.مبينا اغوا ٿيل شاگردياڻي جي والد آغا وحيد پٺاڻ ٻڌايو ته اڌ ڪلاڪ لاءِ به نينگري گهر کان ٻاهر هجي ته پريشان ٿي ويندا هئاسين پر هاڻي ٽن ڏينهن کان لاپتہ آهي. سڄو گهر ذهني اذيت ۽ سوڳ ۾ مبتلا آهي.وارثن جو چوڻ آهي ته پوليس ڪارروائي ۾ سستي ڏيکاري رهي آهي ۽ ٿڪجي ٿڪجي رهيا آهن جڏهن ته پوليس بار بار جواب ڏئي ٿي ته سي ڊي آر اچڻ کان پوءِ اڳڀرائي ٿيندي. مظاهرو ڪندڙن آئي جي سنڌ ۽ ايس ايس پي ملير کان سخت نوٽيس وٺڻ ۽ ڌيءَ کي بازياب ڪرائڻ جو مطالبو ڪيو آهي.علائقي جي رهواسين جو چوڻ آهي ته طيبہ جهڙي ننڍڙي عمر جي ڇوڪري جو اغوا نه صرف خاندان پر مڪمل سماج لاءِ هڪ ڳري واقعو آهي ۽ اهڙي نوعيت جي واقعات تي تيز ۽ موثر ڪارروائي لازمي آهي.پوليس اڃا تائين لاپتہ شاگردياڻي جي ڳولا ۾ مصروف آهي ۽ وارثن ۽ علائقي جي ماڻهن سان رابطو ڪري اطلاعات گڏ ڪري رهي آهي.