بحريا ٽائون انتظاميه جي ڪارروائي، فليٽن آڏو گذرندڙ ٻڪرين کي پڪڙي ورتو

بحريه ٽائون انتظاميه فليٽن آڏو گذرڻ ٻڪريون غيرقانوني طريقي سان کڻي وئي: ڳوٺاڻا

ملير (رپورٽ: عبدالرشيد مورجھريو)بحريا ٽائون ڪراچي جي انتظاميه طرفان هڪ ڀيرو ٻيهر انتهائي تڪراري ۽ غيرقانوني ڪاروائي ڪئي ويئي آهي، جنهن تحت مقامي آبادي جي جانورن کي مبينا طور بنا ڪنهن قانوني جواز جي گرفتار ڪري في جانور ٻه هزار رپيا نقد ڏنڊ وصول ڪيو پيو وڃي، گذريل ڏينهن دريا خان گبول گوٺ جي رهواسين جون چار ٻڪريون بحريا ٽائون جي لگزري گهرن جي سامهونان گذريون ته بحريا ٽائون جي رهواسين ۽ انتظاميه ڪاوڙ جو اظهار ڪندي ٻڪرين کي پڪڙي ورتو ۽ سيڪيورٽي لاڪ اپ ۾ بند ڪري ڇڏيو۔ متاثر ماڻهن جو چوڻ آهي ته ٻڪرين کي ”گرفتار“ ڪرڻ ۽ انهن تي جرمانو لاڳو ڪرڻ سراسر زيادتي ۽ ظلم آهي۔علائقي واسين جو چوڻ آهي ته بحريا ٽائون پاڻ اڃا تائين نيَب، اينٽي ڪرپشن سميت ٻين قانوني ادارن آڏو جوابده آهي ۽ مختلف ڪيسن کي منهن ڏئي رهيو آهي، جڏهن ته بحريا ٽائون جو مالڪ ملڪ رياض ڊگهي عرصي کان روپوش آهي ۽ عدالتي ڪارروائين کان پاسو ڪري رهيو آهي۔ اهڙي صورتحال ۾ هڪ تڪراري ۽ غيرقانوني منصوبي جي انتظاميه جو پاڻ کي قانون کان مٿانهون سمجهڻ ڪيترن ئي سوالن کي جنم ڏئي ٿو۔مقامي ماڻهن جو مؤقف آهي ته جن زمينن تي اڄ بحريا ٽائون جا وڏا ۽ شاندار بنگلا تعمير ٿيل آهن، اهي زمينون صديون پراڻيون مقامي آباديون، گوٺ، چراگاهن جا ميدان، جبل، زرعي زمينون ۽ قدرتي پاڻي جي وهڪرن تي مشتمل هيون، جتي انسانن سان گڏ جانورن جي روزگار ۽ گذر سفر جو ذريعو موجود هو۔علائقي واسين جو چوڻ آهي ته جيڪڏهن هڪ طرف هزارين ايڪڙ زمينن تي قبضا، قدرتي وسيلن جي تباهي ۽ جعلسازي وسيلي ايترو وڏو پروجيڪٽ ٺاهڻ قابلِ گرفت نٿو سمجهيو وڃي، ته ٻي طرف ڪجهه ٻڪرين جو روڊ تي اچي وڃڻ آخر ڪهڙي قانون تحت وڏو ڏوهه بڻجي ويو آهي شهرين، سماجي حلقن ۽ مقامي معزز ماڻهن مطالبو ڪيو آهي ته بحريا ٽائون انتظاميه ۽ ان جي سيڪيورٽي گارڊن خلاف فوري طور تي ايف آءِ آر داخل ڪئي وڃي ۽ مقامي آبادي کي هراسان ڪرڻ جو سلسلو بند ڪيو وڃي۔