ضلعي انتظاميا غريب پورهيتن جو معاشي قتل عام ڪري رهي آهي: سعيده گوپانگ

گذريل ڏينهن ضلعي انتظاميا حددخلين جي نالي تي گلشن حديد سميت مختلف علائقن ۾ ڪارروائيون ڪيون

ملير (رپورٽ: عبدالرشيد مورجھريو) عوامي جمھوري پارٽي جي اڳواڻ سعيده گوپانگ عوامي پريس ڪلب ملير ۾ پريس ڪانفرنس ڪندي چيو آهي ته گذريل ڏينهن ضلعي انتظاميا حددخلين جي نالي تي گلشن حديد سميت مختلف علائقن ۾ ڪارروائيون ڪيون آهن جنهن ۾ فقط پورهيت ماڻهن جي روزگار کي حددخليون ڄاڻائي ڊاهي پٽ ڪيو ويو آهي جيڪو غير قانوني ۽ غير انساني عمل آهي هن چيو ته ضلعي انتظاميا روڊن، رستن سميت بازارن ۾ قبضا ڪندڙ مافيا خلاف ڪارروائي ڪرڻ کان لنوائي ٿي پر ساڳئي وقت منهنجي ڀاءُ سميت سنڌي پورهيت جيڪي ريڙهن تي روزگار ڪن ٿا ۽ پنهنجي ٻچن جو گذر سفر ڪن ٿا انهن تي ڪارروائي ڪئي آهي هن وڌيڪ چيو ته انتظاميا نه صرف ڪاروائي ڪري ريڙها پاڻ سان گڏ کڻيو وڃي پر انهن کي ٽوڙي تباھ ڪري گهگهر ويجهو ڦٽو ڪري ٿي ڇڏي جڏهن ڄاڻايل هنڌ پهتاسين ته اُتي موجود عملدارن سامان کي واپس وٺڻ لاءِ اي سي کان ملندڙ اجازت نامي جي گُهر ڪئي ليٽر موجود نه هئڻ تي کنيل سامان واپس نه ڪيو ويو هن چيو ته بيحسي جي انتها آهي ته ضلعي انتظاميا نقصان به غريب پورهيتن جو ڪري ۽ جڏهن رهيل شيون واپس وٺڻ لاءِ وڃجي ٿو ته اجازت نامي جو ڊرامو رچائي غريبن کي رُلائي تذليل ڪئي پئي وڃي هن مطالبو ڪيو ته ضلعي انتظاميا پورهيت دشمن پاليسي ختم ڪري حقيقي قبضا مافيا خلاف ڪاروائي ڪري ٻي صورت ۾ سخت عوامي ردعمل ڏنو ويندو.