گهگهر ۾ حددخلين خلاف آپريشن، غيرقانوني دڪان ڊاهي پٽ

يوسي چيئرمين حاجي اڪبر ڪلمتي جي نگراني ۾ آپريشن

ملير (رپورٽ: عبدالرشيد مورجھريو) ڊپٽي ڪمشنر ملير جي هدايتن تي يوسي گهگهر ۾ حددخلين خلاف وڏي پيماني تي ڪارروائي ڪئي وئي. آپريشن يوسي چيئرمين حاجي اڪبر ڪلمتي ۽ وائس چيئرمين خليفو عبدالستار جوکيو جي اڳواڻي ۾ عمل ۾ آندو ويو، جنهن دوران روڊن ۽ رستن تي قائم غيرقانوني دڪان ڊاهي پٽ ڪيا ويا جڏهن ته روڊ تي بيٺل رڪشا ۽ ريڙها به هٽايا ويا.ڪارروائي دوران انتظاميا جون ٽيمون، يوسي عملي ۽ لاڳاپيل ادارن جا اهلڪار موجود هئا. آپريشن سبب علائقي ۾ ٽريفڪ جي رواني بحال ٿي ۽ شهرين کي آمدرفت ۾ سهولت ملي،ان موقعي تي ميڊيا سان ڳالهائيندي چيئرمين حاجي اڪبر ڪلمتي ۽ وائس چيئرمين خليفو عبدالستار جوکيو چيو ته دڪاندارن ۽ ريڙهي وارن روڊ کي مڪمل طور تي بند ڪري ڇڏيو هو، جنهن سبب شهرين کي سخت تڪليفن کي منهن ڏيڻو پئي رهيو هو. هنن چيو ته عوامي شڪايتن ۽ ٽريفڪ جي مسئلن کي نظر ۾ رکندي ڊپٽي ڪمشنر ملير جي هدايتن تي اها ڪارروائي ڪئي وئي آهي، هنن وڌيڪ چيو ته روڊن ۽ رستن کي حددخلين کان آجو ڪرائڻ لاءِ اهڙيون ڪاروايون هاڻي باقاعدگي سان جاري رهنديون ۽ جيستائين رستا مڪمل طور صاف نٿا ٿين، آپريشن جاري رکيو ويندو، هڪ سوال جي جواب ۾ چيئرمين ۽ وائس چيئرمين چيو ته قومي شاهراهه تي رڪشن ۽ هيوي گاڏين جي بيهڻ خلاف لاڳاپيل ادارن کي باقاعده خط لکيا ويا آهن، ۽ اميد آهي ته انهن خلاف به جلد ڪارروائي ڪئي ويندي ته جيئن ٽريفڪ جام ۽ حادثن کان بچي سگهجي.شهرين انتظاميا جي هن قدم کي ساراهيندي اميد ظاهر ڪئي آهي ته اهڙيون ڪاروايون تسلسل سان جاري رکيون وينديون ته جيئن گهگهر سميت پوري علائقي ۾ ٽريفڪ، صفائي ۽ امن امان جي صورتحال بهتر بڻجي.