ڀرياسٽي ۾ نجي ٽي وي چينل جي آفيس مان چوري ۽ ڀڃ ڊاهه خلاف نوشهروفيروز ۾ احتجاج

محمد يونس راڄپر، ايم ظفر تڳر، محبوب ڪلهوڙو، غلام شبير اڄڻ، مولابخش مشوري ۽ ٻين احتجاج ڪيو

نوشهروفيروز (ڊ ر) نوشهروفيروز ۾ قلم ڌڻين جو ڀرياسٽي ۾ نجي ٽي وي ۽ اخبار جي آفيس ۾ ڀڃ ڊاهه کان پوءِ چوري ڪرڻ توڙي صحافين کي ڌمڪيون ڏيڻ خلاف پريس ڪلب اڳيان احتجاجي مظاهرو ڪيو ويو جنهن جي اڳواڻي پريس ڪلب نوشهروفيروز جي صدر محمد يونس راڄپر ، نيشنل پريس ڪلب جو صدر ايم ظفر تڳر ، سنڌ جرنلسٽس ڪائونسل جو صدر محبوب ڪلهوڙو، غلام شبير اڄڻ، مولابخش مشوري ۽ ٻيا ڪري رهيا هئا جن پوليس جي نااهلي ۽ واقعي خلاف نعري بازي به ڪئي ان موقعي تي ميڊيا سان ڳالهائيندي قلم ڌڻين چيو ته ڀرياسٽي سميت سڄي ضلعي مان صحافين جون چوريون ۽ سندن کان ٿيل ڦرون ٿيل آهن پر ايس ايس پي نوشھروفيروز روحل خان کوسو خاموشي سان تماشائي بڻيل آهي جنهن سبب گذريل رات ڀرياسٽي ۾ قائم هڪ نجي ٽي وي ۽ اخبار جي آفيس تي نامعلوم جوابدارن پاران ڀڃ ڊاهه ڪري چوري ڪئي وئي آهي جنهن جي اسين سخت لفظن ۾ مذمت ڪيون ٿا هنن چيو ته گذريل ڪجهه ڏينهن کان صحافي آفتاب ڪيريو سميت ٻين صحافين کي ڌمڪيون ملي رهيون هيون پر ايس ايس پي نوشھروفيروز سميت ڀريا سٽي پوليس ان ڌمڪين جو ڪنهن به نوٽيس نه ورتو نه ئي جوابدار کي گرفتار ڪيو ويو هنن چيو ته ايس ايس ايس روحل کوسو جي لاپرواهي جي ڪري ضلعي جي صحافين سميت شريف شهري عدم تحفظ جو شڪار ٿي ويا آهن هنن آءِ جي سنڌ ، ڊي آءِ جي شهيد بينظير آباد سميت ٻين وس وارن کان مطالبو ڪندي چتاءُ ڏنو ته جيڪڏهن صحافين جي ٿيل چورين ۽ ڦرن جو نوٽيس نه ورتو ويو ۽ چوري ٿيل توڙي ڦريل سامان واپس نه ڪرايو ويو ته ايندڙ سومر کان احتجاج کي سخت ڪيو ويندو