ٻي عالمي ٿولهه ڪانفرنس 2026 پڄاڻي تي پهتي، ماهرن ٿولهه کي صحتِ لاءِ وڏو خطرو قرار ڏئي ڇڏيو

نوابشاهه؛ ايشين انسٽيٽيوٽ آف ميڊيڪل سائنسز حيدرآباد جي سربراهه پروفيسر ڊاڪٽر صادق ميمڻ جي نگراني ۾ پيپلز يونيورسٽي آف ميڊيڪل اينڊ هيلٿ سائنسز (PUMHS) نوابشاهه جي لطيف هال ۾ ٻي عالمي موٽاپا ڪانفرنس 2026 منعقد ڪئي وئي. ڪانفرنس ۾ پاڪستان سميت پرڏيهه مان آيل نامياري طبي ماهرن، سرجنن، اينڊوڪرائينولوجسٽن، نيوٽريشن ماهرن، محققن ۽ ميڊيڪل شاگردن وڏي انگ ۾ شرڪت ڪئي.ڪانفرنس جو مقصد موٽاپي جهڙي سنگين بيماري جي وڌندڙ شرح، ان جا سبب، اثرات ۽ جديد طبي ۽ علاج بابت تفصيلي بحث ڪرڻ هو. ان موقعي تي پروفيسر ڊاڪٽر محمد صادق ميمڻ، وائيس چانسلر پروفيسر ڊاڪٽر گلشن ميمڻ ۽ ٻين چيو ته موٽاپو هاڻي صرف جسماني خوبصورتي يا جسامت جو مسئلو نه رهيو آهي، بلڪه اهو ذيابطيس، دل جي بيمارين، هاءِ بلڊ پريشر، فالج، بانجھ پن ۽ ٻين ڪيترين ئي جان ليوا بيمارين جو بنيادي سبب بڻجي چڪو آهي.ڪانفرنس جي مختلف سائنسي سيشنن دوران موٽاپي جي جديد علاج، بيريئٽرڪ سرجري، دوائن ذريعي علاج، هارمونل عنصر، متوازن خوراڪ، جسماني سرگرمي ۽ طرزِ زندگي ۾ تبديلي بابت تفصيلي ليڪچرز ۽ پريزينٽيشنون پيش ڪيون ويون. ماهرن ان ڳالهه تي زور ڏنو ته متوازن غذا، باقاعده ورزش ۽ صحتمند طرزِ زندگي اختيار ڪري موٽاپي تي وڏي حد تائين ضابطو آڻي سگهجي ٿو.مقررن چيو ته پاڪستان ۾ غير صحتمند خوراڪ، فاسٽ فوڊ جو وڌندڙ رجحان، جسماني سرگرميءَ ۾ گهٽتائي ۽ آگاهيءَ جي کوٽ موٽاپي جي واڌ جا وڏا سبب آهن. هنن حڪومت، طبي ادارن ۽ تعليمي ادارن تي زور ڏنو ته اهي گڏيل طور عوام ۾ آگاهي وڌائڻ لاءِ قدم کڻن.ڪانفرنس کي خطاب ڪندي ماهرن اهو به چيو ته جيڪڏهن موٽاپي جي بروقت سڃاڻپ ۽ مناسب علاج نه ڪيو ويو ته ان سان صحت جي نظام تي اضافي بار پوندو. هنن چيو ته اهڙيون عالمي ڪانفرنسون جديد تحقيق جي ڏي وٺ، طبي ماهرن جي وچ ۾ رابطن ۽ مريضن جي بهتر علاج لاءِ اهم ڪردار ادا ڪن ٿيون. آخر ۾ ان عزم جو اظهار ڪيو ويو ته مستقبل ۾ به اهڙيون علمي ۽ سائنسي گڏجاڻيون جاري رکيون وينديون ته جيئن صحتِ عامه جي مسئلن تي اثرائتي نموني سان ضابطو آڻي سگهجي.