ڊي سي ٺٽو پاران ڀنڀور جي سمنڊ ڪناري مينگروز جا ٻوٽا لڳائي وڻڪاري مهم جو آغاز

ٺٽو (محمد شفيق ڀٽي) ڊپٽي ڪمشنر ٺٽو سرمد علي ڀاڳت تاريخي ماڳ ڀنڀور جي سمنڊ ڪناري مينگروز جا ٻوٽا لڳائي شجرڪاري مهم جو باقاعده آغاز ڪيو. ان موقعي تي ڳالهائيندي ڊپٽي ڪمشنر چيو ته مينگروز جا ٻوٽا پوکڻ جو مقصد موسمياتي تبديلي جي منفي اثرن، قدرتي آفتن ۽ سائيڪلون کان تحفظ مهيا ڪرڻ آهي. هن چيو ته هزارين سالن جي قديم آثارن تي ٻڌل تاريخي ماڳ ڀنڀور کي محفوظ بڻائڻ ۽ ان کي فروغ ڏيڻ به هن مهم جو اهم مقصد آهي، ته جيئن نوجوان نسل کي پنهنجي تهذيب ۽ ثقافت سان روشناس ڪرايو وڃي. ڊپٽي ڪمشنر وڌيڪ چيو ته ضلع ٺٽو جي سموري ساحلي پٽي تي مينگروز جي وڻن جي سخت ضرورت آهي، ڇو ته اهي وڻ سامونڊي ڪٽاؤ ۽ طوفانن کان ساحلي علائقن کي بچائڻ ۾ اهم ڪردار ادا ڪن ٿا. هن چيو ته هن سرگرمي وسيلي هڪ مثبت پيغام ويندو ۽ عوام ۾ ماحولياتي تحفظ بابت شعور وڌندو. ڊپٽي ڪمشنر زور ڏنو ته هن تاريخي آثارن واري ماڳ کي محفوظ بڻائڻ لاءِ گڏيل ۽ مربوط قدمن جي ضرورت آهي ۽ مينگروز جي واڌاري سان نه رڳو ماحول بهتر ٿيندو پر ساحلي علائقن جو قدرتي بچاءُ پڻ مضبوط ٿيندو. هن لاڳاپيل ادارن ۽ شهرين تي زور ڏنو ته مينگروز جي شجرڪاري کي وڌيڪ هٿي ڏني وڃي. تقريب ۾ ٻيلو کاتو، وائلڊ لائيف، سياحت، ثقافت، سوشل ويلفيئر ۽ ٻين کاتن جي آفيسرن، آغا خان فائونڊيشن ۽ ٻين اين جي اوز جي نمائندن شرڪت ڪئي. ان کان علاوه سنڌ يونيورسٽي ڪيمپس ٺٽو جي پروفيسرن ۽ شاگردن، مختلف اسڪولن جي نياڻين، وڪيلن، صحافين، ماحولياتي ماهرن ۽ مختلف مڪاتبِ فڪر سان تعلق رکندڙ ماڻهن پڻ شرڪت ڪئي .تقريب جي پڄاڻي تي شرڪت ڪندڙن مينگروز جي اهميت اجاگر ڪرڻ ۽ ساحلي پٽي جي تحفظ لاءِ گڏيل ڪوششون جاري رکڻ جو عزم ظاهر ڪيو. ان کان اڳ ڊپٽي ڪمشنر سرمد علي ڀاڳت شرڪت ڪندڙن کي ڀنڀور ميوزيم جو دورو ڪرايو جتي هن تاريخي ۽ قديمي شين بابت ڄاڻ پڻ فراهم ڪئي