گورنر ڪامران ٽيسوري جي بيان خلاف ايس ٽي پي پاران گھگھر ۾احتجاجي ريلي

گھگھر کان قومي شاھراھ تائين احتجاجي ريلي ڪڍي ڌرڻو هنيو ويو، گورنر گورنر گو جا نعرا

ملير (رپورٽ: عبدالرشيد مورجھريو)گورنر سنڌ ڪامران ٽيسوري طرفان سنڌ جي وحدت ۽ سنڌ ترقي پسند پارٽي جي سربراھ ڊاڪٽر قادر مگسي بابت ڏنل بيان خلاف سنڌ ترقي پسند پارٽي ملير طرفان ڊويزنل اڳواڻ پير بخش بهلڪاڻي، ڪامريڊ رجب زھراڻي اصغر سبزوئي اصغر مگسي حفيظ زھراڻي علي نواز لنجواڻي ديدار سبزوئي جي اڳواڻي ۾ گھگھر کان قومي شاھراھ تائين احتجاجي ريلي ڪڍي مظاھرو ڪيو ويو، مظاھرين جي ھٿن ۾ بينر ۽ پلي ڪارڊ ھئا ھو گو گورنر گو جا اڀ ڏاريندڙ نعرا هڻي رھيا ھئا ان موقعي تي ريلي کي خطاب ڪندي اڳواڻن چيو ته گورنر جو عهدو آئيني ۽ غير جانبدار هوندو آهي، جنهن جو بنيادي فرض صوبي جي وحدت، عوامي هم آهنگي ۽ ڀلائي لاءِ ڪم ڪرڻ آهي، پر موجوده گورنر لساني بنيادن تي سياست ڪري سنڌ جي وحدت کي نقصان پهچائڻ جي ڪوشش ڪري رهيو آهي. هنن مؤقف اختيار ڪيو ته ڊاڪٽر قادر مگسي خلاف بيان دراصل سنڌي قوم جي سياسي جدوجهد کي بدنام ڪرڻ جي سازش آهي.اڳواڻن وڌيڪ چيو ته سنڌ کي ورهائڻ يا لساني تڪرار پيدا ڪرڻ واري ڪنهن به بيان يا سازش کي سختي سان رد ڪيو ويندو. هنن واضع ڪيو ته سنڌ ڌرتيءَ جي وحدت، وسيلن ۽ سڃاڻپ تي ڪو به سودو قبول نه ڪيو ويندو ۽ ھنن چيو ته سنڌ دشمن قوتن خلاف 12 اپريل تي ڪراچي ۾ جناح باغ ۾ پارٽي سربراهه ڊاڪٽر قادر مگسي جي اڳواڻي ۾ وڏو عوامي احتجاجي ڪيو ويندو جنھن سنڌ جا لکين غيرت مند سپوت شرڪت ڪري پنھنجي ڌرتيءَ ماء سان محبت جو اظهار ڪندا اڳواڻن ملير سميت سنڌ جي عوام، سياسي ڪارڪنن ۽ قومپرست ڌرين کي اپيل ڪئي ته هو تعداد ۾ شرڪت ڪري سنڌ دشمن بيانن خلاف گڏيل آواز اٿارين ۽ گورنر کي عهدي تان هٽائڻ لاءِ پرامن جدوجهد کي ڪامياب بڻائين.