ملير سپر هاءِ وي ڪريم ٽائون ڀرسان هاءِ ٽينشن تار جي مبينا چوري دوران ڪرنٽ لڳڻ سبب هڪ ڄڻو فوت

ملير (رپورٽ: عبدالرشيد مورجھريو) سپر هاءِ وي ڪراچي لڳ ڪريم ٽائون ڀرسان بجلي جي هاءِ ٽينشن تار مبينا چوري دوران ڪرنٽ لڳڻ سبب هڪ ڄڻو پول تان ڪري فوت ٿي ويو.پوليس موجب واقعو گڏاپ ٿاڻي جي حدن اندر پيش آيو، جتي نامعلوم شخص بجلي جي کُمڀي تي چڙهي هاءِ ٽينشن تار لاهڻ جي ڪوشش ڪري رهيو هو ته اوچتو تيز ڪرنٽ لڳڻ سبب هيٺ ڪري پيو. شديد سڙڻ ۽ ڪرڻ جي ڪري هن موقعي تي ئي دم ڏئي ڇڏيو.اطلاع ملڻ تي پوليس ۽ امدادي ٽيمون واقعي واري هنڌ پهتيون. فوتي جو لاش ايدهي فائونڊيشن جي ايمبولينس ذريعي قانوني ڪارروائي لاءِ عباسي شهيد اسپتال منتقل ڪيو ويو.پوليس موجب فوت ٿيل شخص جي سڃاڻپ اڃا تائين نه ٿي سگهي آهي. سندس عمر اندازاً 30 کان 35 ورهين جي وچ ۾ ٻڌائي پئي وڃي. ضابطي جي ڪارروائي بعد لاش مرده خاني منتقل ڪيو ويو آهي، جڏهن ته سڃاڻپ ۽ وڌيڪ جاچ جو عمل جاري آهي.پوليس اختيارين جو چوڻ آهي ته هاءِ ٽينشن تارن جي چوري نه رڳو غير قانوني عمل آهي پر انتهائي خطرناڪ پڻ آهي، جنهن سبب قيمتي جاني نقصان ٿي سگهي ٿو. واقعي بابت وڌيڪ جاچ جاري آهي.