پورٽ قاسم ڀرسان ملٽي نيشنل ڪمپني خلاف پورهيتن جو ڌرڻو، ٽريفڪ معطل

ملير (رپورٽ: عبدالرشيد مورجھريو)پورٹ قاسم لڳ هڪ ملٽي نيشنل ڪمپني پاران پورهيتن کي مبينا طور نيڪالي ڏيڻ ۽ اجرت ادا نه ڪرڻ خلاف مزدورن احتجاجي مظاهرو ڪري ڌرڻو هنيو، جنهن سبب ايندڙ ويندڙ ٽريفڪ ڪافي دير تائين معطل رهي ۽ گاڏين جون قطارون لڳي ويون.احتجاج ڪندڙ پورهيتن جو چوڻ آهي ته ڪمپني ملڪ اندر پروڊڪشن بند ڪرڻ جو جواز پيش ڪري کين اوچتو نوڪرين تان فارغ ڪري رهي آهي. مزدورن موجب انتظاميا اڳ ۾ واعدو ڪيو هو ته نيڪالي جي صورت ۾ قانوني معاوضو ۽ رهتون ادا ڪئي وينديون پر هينئر تائين کين ڪا به ادائگي نه ڪئي وئي آهي.پورهيتن چيو ته عيد ويجهو آهي ۽ کين پنهنجي محنت جا پئسا به نٿا ڏنا وڃن، جيڪا کين ۽ سندن گهرڀاتين سان ناانصافي آهي. هنن مطالبو ڪيو ته فوري طور بقايہ اجرت ادا ڪئي وڃي؛قانون موجب نيڪالي جو معاوضو ڏنو وڃي بنا جواز نيڪاليون واپس وٺي پورهيتن کي بحال ڪيو وڃي.موقعي تي پوليس پهچي صورتحال تي نظر رکي. آخري اطلاعن تائين ڪمپني انتظاميا طرفان ڪو باضابطه بيان جاري نه ڪيو ويو هو. پورهيتن خبردار ڪيو ته سندن جائز مطالبا نه مڃيا ويا ته احتجاج جو دائرو وڌايو ويندو.