ملير پوليس پاران وڏي تعداد ۾ شراب هٿ ڪرڻ جي دعويٰ

ڀڳوان داس وٽان 300 کان وڌيڪ شراب جون بوتلون هٿ ڪيون: پوليس

ملير (رپورٽ: عبدالرشيد مورجھريو)ملير پوليس جي ڪارروائي، ڪلينڪ جي آڙ ۾ شراب وڪرو ڪرڻ جو راز سامهون اچي ويو، ملير جي علائقي ابراهيم حيدري ۾ پوليس ڪارروائي ڪندي طبي ڪلينڪ جي آڙ ۾ مبينا طور شراب وڪرو ڪندڙ نيٽ ورڪ جو انڪشاف ڪيو آهي، ايس ايچ او ابراهيم حيدري غوث بخش اعواڻ پوليس ٽيم سان گڏ جمعه ڳوٺ ۾ ڳجهي اطلاع تي ڇاپو هڻي ڪارروائي ڪئي، جنهن جي نتيجي ۾ هڪ جوابدار کي گرفتار ڪيو ويو، گرفتار جوابدار جي سڃاڻپ ڀڳوان داس جي نالي سان ٿي آهي، پوليس موجب شروعاتي جاچ دوران معلوم ٿيو ته گلشن عرف ڊاڪٽر گل نالي شخص پاڻ کي ڊاڪٽر ظاهر ڪري طبي ڪلينڪ جي آڙ ۾ غيرقانوني طور شراب وڪرو ڪرڻ جو ڌنڌو هلائي رهيو هو، جوابدار ٻڌايو ته ڄاڻايل شخص حقيقت ۾ ڊاڪٽر ناهي، پر جعلي سڃاڻپ ذريعي شهرين کي دوکو ڏئي رهيو هو ۽ انهيءَ نيٽ ورڪ وسيلي شراب وڪرو ڪئي ويندي هئي، ڪارروائي دوران پوليس گرفتار جوابدار جي قبضي مان 300 کان وڌيڪ شراب جون بوتلون هٿ ڪري ورتيون، جوابدار وڌيڪ ٻڌايو ته ڊاڪٽر گلشن عرف ڊاڪٽر گل ۽ سني نالي ماڻهو به هن غيرقانوني سرگرمي ۾ ملوث آهن، جن جي گرفتاري لاءِ ڇاپا هنيا پيا وڃن، پوليس اختيارين موجب گرفتار جوابدار جو ڪرمنل رڪارڊ پڻ چيڪ ڪيو پيو وڃي، جڏهن ته سندس خلاف ضابطي موجب ڪيس داخل ڪري وڌيڪ جاچ ڪئي ويندي