ٺٽي ۾ ٻيلي کاتي جي زمينن تان غيرقانوني قبضا ختم ڪرائڻ جو فيصلو

ڊپٽي ڪمشنر سرمد علي ڀاڳت جي صدارت هيٺ دربار هال مڪلي ۾ اجلاس ٿيو

ٺٽو (محمد شفيق ڀٽي) ڊپٽي ڪمشنر ٺٽو سرمد علي ڀاڳت جي صدارت هيٺ ضلعي اندر ٻيلي کاتي جي سرڪاري زمينن تي قائم غيرقانوني قبضا ختم ڪرائڻ ۽ سرڪاري زمين واپس وٺڻ بابت اهم اجلاس دربار هال مڪلي ۾ منعقد ٿيو. اجلاس ۾ ايس ايس پي فاروق احمد بجاراني، لاڳاپيل اسسٽنٽ ڪمشنرن، رينجرز عملدارن، ٻيلي کاتي جي آفيسرن ۽ ٻين لاڳاپيل کاتن جي نمائندن شرڪت ڪئي. اجلاس دوران ٻيلي کاتي جي زمينن تي ٿيل قبضن بابت صورتحال جو تفصيلي جائزو ورتو ويو ۽ غيرقانوني قبضا خلاف اثرائتي ڪارروائي بابت غور ڪيو ويو. ڊپٽي ڪمشنر سرمد علي ڀاڳت هدايت ڪئي ته ٻيلي کاتي جي سرڪاري زمين تان غيرقانوني قبضا هٽائڻ لاءِ باقاعده شيڊول جاري ڪيو وڃي. هن لاڳاپيل آفيسرن کي هدايت ڪئي ته جلد کان جلد مربوط ۽ منظم آپريشن شروع ڪري سرڪاري زمين خالي ڪرائي وڃي. هن واضح ڪيو ته سرڪاري زمينن تي ڪنهن به قسم جو غيرقانوني قبضو هرگز برداشت نه ڪيو ويندو ۽ قانون جي عملداري کي يقيني بڻايو ويندو . اجلاس ۾ فيصلو ڪيو ويو ته آپريشن دوران سيڪيورٽي ۽ قانوني گهرجن کي نظر ۾ رکندي گڏيل حڪمت عملي اختيار ڪئي ويندي ته جيئن ڪارروائي اثرائتي ۽ پُرامن نموني مڪمل ڪري سگهجي.