ملير: ڀٽائي آباد فائرنگ ڪيس: سيد طحا شاهه جي قاتلن جي گرفتاري لاءِ وارثن جو احتجاج

سيد طحا شاهه جي وارثن ۽ علائقي واسين سندس قاتلن جي گرفتاري لاءِ پلي ڪارڊ کڻي احتجاج ڪيو

ملير (رپورٽ: عبدالرشيد مورجھريو)ڀٽائي آباد جي علائقي شادي خان چوڪ تي ڪجهه ڏينهن اڳ فائرنگ ڪري قتل ڪيل نوجوان سيد طحا شاهه جي قاتلن جي گرفتاري لاءِ وارثن ۽ علائقي واسين احتجاجي مظاهرو ڪيو۔ مظاهرو ڪندڙن هٿن ۾ پلي ڪارڊ کڻي قاتلن جي فوري گرفتاري ۽ انصاف جو مطالبو ڪندا رهيا۔ مقتول جي ڀاءُ آصف شاهه ميڊيا سان ڳالهائيندي چيو ته واقعي کي پنج ڏينهن گذري چڪا آهن، پر پوليس هن مهل تائين اصل قاتلن خلاف ڪا به مؤثر ڪارروائي ناهي ڪئي۔ هن الزام هنيو ته پوليس رڳو هڪ ڄڻي کي گرفتار ڪري ايف آءِ آر داخل ڪئي آهي، جڏهن ته اصل قاتل اڃا تائين آزاد گھمي رهيو آهي۔وارثن موجب جوابدار سوشل ميڊيا تي وڊيو بيان جاري ڪري وڌيڪ ماڻهن کي مارڻ جون ڌمڪيون ڏئي رهيو آهي، جنهن سبب کين سخت خطرا لاحق آهن۔ هنن چيو ته پوليس نه صرف کين تحفظ فراهم ڪرڻ ۾ ناڪام رهي آهي پر ساڻن مڪمل تعاون به نٿي ڪري۔آصف شاهه چيو ته سندس ڀاءُ محنت مزدوري ڪري گهر جو گذر سفر هلائيندو هو ۽ کيس بيگناهه قتل ڪيو ويو آهي۔ هن مطالبو ڪيو ته جوابدارن کي جلد کان جلد گرفتار ڪري قانون موجب سخت سزا ڏني وڃي۔ مظاهرو ڪندڙن آءِ جي سنڌ ۽ ٻين وس وارن کان اپيل ڪئي ته واقعي جو نوٽيس وٺي اصل قاتل کي گرفتار ڪري وارثن سان انصاف ڪيو وڃي۔