رزاق آباد ۽ ڀرپاسي وارن علائقن ۾ 15 ڏينهن کان بجلي بند، رهواسين جو ڌرڻو

مڇريل شهرين وڏي تعداد ۾ گهرن مان نڪري قومي شاهراهه تي ڌرڻو هڻي ويهي رهيا، ٽريفڪ معطل

ملير (رپورٽ: عبدالرشيد مورجھريو) رزاق آباد ۽ ڀرپاسي وارن علائقن ۾ گذريل پندرهن ڏينهن کان بجلي جي لڳاتار بندش خلاف رهواسين جو صبر جواب ڏئي ويو. مشتعل شهرين وڏي تعداد ۾ گهرن مان نڪري قومي شاهراهه تي ڌرڻو هنيو ۽ روڊ هر قسم جي ٽرئفڪ لاءِ بند ڪري ڇڏيو، جنهن سبب ڪراچي کان ٺٽو ۽ پورٽ قاسم ويندڙ گاڏين جون ڊگهيون قطارون لڳي ويون ۽ ٽرئفڪ جو نظام مڪمل طور مفلوج ٿي ويو احتجاج ۾ رزاق آباد، ڌڻي پرتَو، نوحاڻي ڳوٺ، لاشاري ڳوٺ، پير سرهندي، ڄام ڪنڊو سميت پولي ٽريٽ فيڊر سان لاڳاپيل سوين ڳوٺن جا رهواسي وڏي تعداد ۾ شريڪ ٿيا. مظاهرين جو چوڻ هو ته رمضان المبارڪ جي بابرڪت مهيني ۾ به بجلي جي عدم فراهمي سندن زندگيون عذاب بڻائي ڇڏيون آهن. روزيدارن کي سحري ۽ افطاري جي تيارين ۾ سخت مشڪلاتن کي منهن ڏيڻو پوي ٿو، جڏهن ته پاڻي جي فراهمي به سخت متاثر ٿي رهي آهي مظاهرين الزام لڳايو ته ڪي اليڪٽرڪ انتظاميا وٽ ڪيترائي ڀيرا شڪايتون داخل ڪرائڻ ۽ لاڳاپيل اختيارين کي آگاهه ڪرڻ باوجود بجلي بحال نه ڪئي وئي آهي. هنن چيو ته پندرهن ڏينهن کان پورو علائقو اوندهه ۾ ٻڏل آهي پر سندن دانهن ٻڌڻ وارو ڪو به ناهي احتجاج سبب قومي شاهراهه تي گاڏين جون ڊگهيون قطارون لڳي ويون، جنهن ڪري مسافرن ۽ ٽرانسپورٽرن کي سخت پريشاني کي منهن ڏيڻو پيو. بعد ۾ مقامي انتظاميا ۽ پوليس عملدارن مظاهرين کي ڌرڻو ختم ڪرڻ تي زور ڀريو، پر مظاھرين واضح ڪيو ته جيڪڏهن بجلي فوري طور بحال نه ڪئي وئي ته ڌرڻو ختم نہ ڪيو ويندو.