اڳوڻي ايم اين اي نواب يوسف ٽالپر جي وڇوڙي کي سال مڪمل، سندس پهرين ورسي تقريب ۾ هزارين ماڻهو شريڪ، کيس ڀيٽا پيش

عمرڪوٽ(رپورٽ:ڪانجي مل رکيسر) ڪنري ڀرسان اڳوڻي ايم اين اي نواب يوسف ٽالپر جي پھرين ورسي ملھائي وئي، مرحوم جي ايصالِ ثواب لاءِ قرآن خواني ۽ فاتحہ خواني ڪئي وئي، گل نڇاور ڪيا ويا. تقريب ۾ ايم اين ايز، ايم پي ايز، پارٽي اڳواڻن، ۽ شهرين وڏي انگ ۾ شرڪت ڪئي.تفصيل موجب پ پ پ جي اڳوڻي ايم اين اي مرحوم نواب يوسف تالپور جي پهرين ورسي جي تقريب ڪنري ڀرسان سندس ڳوٺ مانجهاڪر ۾ ٿي، مرحوم جي ايصالِ ثواب لاءِ قرآن خواني ۽ فاتحہ خواني ڪئي وئي، گل نڇاور ڪيا ويا. تقريب ۾ ايم اين ايز پير آفتاب شاهه جيلاني، مھيش ملاڻي، پير امير علي شاھ جيلاني، مرحوم جي ڀائرن اڳوڻو ايم اين اي نواب غني ٽالپر، نواب زبير ٽالپر، نواب مظفر ٽالپر، فرزند ايم پي اي نواب تيمور ٽالپر، ايم پي ايز شير محمد بلالاڻي، ارباب لطف الله، خانقاه گلزار خليل سامارو جي سجادا نشين پير محمد ايوب جان سرهندي، ضلع ڪائونسل عمرڪوٽ جو چيئرمين حاجي محمد بقا پلي، ڊپٽي ڪمشنر عمرڪوٽ نويد الرحمان لاڙڪ، اڳوڻو تعلقه ناظم محمد ڄام ميمڻ،چئيرمين ايم سي عمرڪوٽ حاجي خالد سراج سومرو ،ضلع ڪائونسل ٿرپارڪر جو چيئرمين غلام حيدر سميجو،برهان دين ڪنڀار، گھنشام راٺوڙ،رميش ڪمار مالهي،بنسي مالهي، رسول بخش رحمداڻي، غلام محمد ڪنڀار، سجاد شيخ، راجا رامچند مالھي،گلزار سمون،۽ جي ڊي اي اڳواڻ خضر حيات منگريو سميت سياسي، سماجي اڳواڻن ۽ شهرين هزارين جي تعداد ۾ شرڪت ڪئي. ان موقعي تي مقررن مرحوم نواب يوسف ٽالپر جي عوامي خدمتن کي زبردست خراجِ تحسين پيش ڪندي چيو ته هن هميشه شرافت جي سياست ڪئي ۽ زرعي پاڻي سميت عوامي مسئلن بابت اسيمبلي فلور تي مضبوط آواز اٿاريو. هنن چيو ته نواب يوسف ٽالپر شهيد ذوالفقار علي ڀٽو ۽ شهيد محترمه بينظير ڀٽو جا ويجها ۽ پراڻا ساٿي هئا ۽ آخري دم تائين سندن مشن سان وفادار رهيا، مرحوم نواب محمد يوسف ٽالپر عوام جو سچو همدرد، غريبن جو دوست ۽ سنڌ جي مسئلن جو حقيقي ترجمان هو، هو قومي اسيمبلي ۾ خاص طور پاڻي، روزگار ۽ ترقياتي منصوبن بابت پنهنجي تڪ ۽ سنڌ جي عوام جي ڀرپور نمائندگي ڪندو رهيو. مرحوم ٿر ۽ عمرڪوٽ جي نوجوانن کي روزگار فراهم ڪرڻ، ترقياتي منصوبن ۽ بنيادي سهولتن جي بهتري لاءِ اهم ڪردار ادا ڪيو، هنن وڌيڪ چيو ته مرحوم نواب محمد يوسف ٽالپر هڪ بااصول، بهادر ۽ عوام دوست اڳواڻ هو، هو ڪارڪنن جي عزت ڪندو هو.