سجاول ضلعي ۾ ڪارروائين دوران هٿ ڪيل منشيات ساڙي ضايع ڪئي وئي

عدالتي حڪم تي گهٽڪو، مين پڙيون، ڪچو شراب ۽ ٻي منشيات توڙي سامان ساڙيو ويو

عدالتي حڪم تي گهٽڪو، مين پڙيون، ڪچو شراب ۽ ٻي منشيات توڙي سامان ساڙيو ويو سجاول (رپورٽر) سجاول ضلعي پوليس پاران منشيات خلاف جاري مهم دوران مختلف ڪارروائين ۾ برآمد ڪيل وڏي مقدار ۾ منشيات عدالت جي حڪم تي تلف ڪري ڇڏي وئي۔ سيڪنڊ سول جج محمد بچل پھوڙ جي عدالت ۾ منشيات تلف ڪرڻ بابت حڪم جاري ڪيو ويو، جنهن تحت ضلعي پوليس برآمد ٿيل گھٽڪي جون سپاريون، ڪچو شراب، انڊين پڙيون ۽ منشيات ۾ استعمال ٿيندڙ ٻيو سامان ساڙي ختم ڪيو۔ منشيات تلف ڪرڻ جي عمل دوران ايس پي سجاول علينا راڄپر، عدالتي عملدارن ۽ پوليس آفيسرن جي موجودگي ۾ سخت سيڪيورٽي انتظام ڪيا ويا هئا۔ پوليس اختيارين موجب هزارين جي تعداد ۾ گھٽڪي ۽ ٻين منشيات جو مٽيريل ضابطي موجب ساڙي ناس ڪيو ويو ته جيئن ٻيهر مارڪيٽ ۾ نه اچي سگهي۔ ان موقعي تي ايس پي سجاول چيو ته منشيات خلاف ڪارروائيون بنا ڪنهن فرق جي جاري رهنديون ۽ نوجوان نسل کي منشيات جي لعنت کان بچائڻ لاءِ سخت قدم کنيا پيا وڃن۔ هن چيو ته عدالت جي نگراني ۾ منشيات تلف ڪرڻ سان شفافيت يقيني بڻائي وئي آهي۔ شهرين پاران پوليس جي هن قدم کي ساراهيو ويو ۽ اميد ظاهر ڪئي وئي ته ضلعي اندر منشيات فروش عناصر خلاف اهڙيون ڪارروائيون جاري رهنديون۔