ملير: پي پي ايڇ آءِ اسپتال مراد ميمڻ ڳوٺ ۾ رٽائر ٿيندڙ ڊاڪٽرن جي اعزاز ۾ تقريب

تقريب دوران ڊاڪٽر محمد صالح ڏيپر ۽ ڊاڪٽر عظمت الله قادري کي ڀيٽا پيش ڪئي وئي

ملير (رپورٽ: عبدالرشيد مورجھريو) مراد ميمڻ ڳوٺ اسپتال ۾ ميڊيڪل سپرنٽنڊنٽ ڊاڪٽر محمد صالح ڏيپر ۽ ڊاڪٽر عظمت الله قادري جي رٽائرمينٽ جي موقعي تي ڊاڪٽرن ۽ پيرا ميڊيڪل اسٽاف پاران هڪ پروقار تقريب منعقد ڪئي وئي۔تقريب دوران ٻنهي ڊاڪٽر صاحبن کي سندن ڊگهي، ايماندار ۽ شاندار خدمتن جي اعتراف طور اعزازي شيلڊون ۽ اجرڪن جا تحفا پيش ڪيا ويا۔ ان موقعي تي مقررن پنهنجي خطاب ۾ ڊاڪٽر محمد صالح ڊيپر ۽ ڊاڪٽر عظمت الله قادري جي پيشاورانه صلاحيتن، ديانتداري ۽ عوامي خدمت کي ڀرپور خراجِ تحسين پيش ڪيو ۽ سندن صحت ۽ سلامتي لاءِ خصوصي دعائون به گهريون ويون۔پنهنجي خطاب ۾ ڊاڪٽر محمد صالح ڊيپر چيو ته هن پنهنجي ڪيريئر جي شروعات انتهائي ڏکين ۽ پسمانده علائقن کان ڪئي ۽ گذريل ڏهن سالن کان مراد ميمن ڳوٺ اسپتال ۾ لڳاتار ايمانداري ۽ محنت سان خدمتون سرانجام ڏنيون۔ هن چيو ته اڄ الحمدلله هي اسپتال غريب عوام کي معياري طبي سهولتون فراهم ڪندڙ هڪ بهترين اداري طور سڃاتو وڃي ٿو۔ هن پنهنجي حوصلا افزائي تي سڀني ڊاڪٽرن ۽ پيرا ميڊيڪل اسٽاف جا ٿورا مڃيا۔تقريب ۾ پي پي ايڇ آءِ جي ايڊمنسٽريٽر ڪرشن صاحب، ڊاڪٽر عظمت الله، ميڊيڪل سپرنٽنڊنٽ ڊاڪٽر زينب شاهه، ڊاڪٽر شاهد ڀٽ، ڊاڪٽر اروبا، ڊاڪٽر عاليه، ڊاڪٽر اسامه، ڊاڪٽر شعيب مغل، ڊاڪٽر عارف شاهه، ڊاڪٽر سليم شيخ، رضوان عٽماني، سليم جي ميمن سميت ٻين ڊاڪٽرن ۽ پيرا ميڊيڪل عملي وڏي انگ ۾ شرڪت ڪئي۔