رزاق آباد ۾ پاڻي بجلي گئس ۽ ٻين سهولتن جي اڻهوند خلاف رهواسي سراپا احتجاج

ملير (رپورٽ: عبدالرشيد مورجھريو) ملير جي علائقي رزاق آباد ۾ گذريل هڪ هفتي کان بجلي، پاڻي ۽ گيس جي فراهمي مڪمل طور بند هجڻ خلاف رهواسين جو احتجاج شدت اختيار ڪري ويو آهي. ڳوٺاڻن ڪامريڊ وھاب گبول، نبي بخش شيخ، غلام رسول گبول، محمد شاهه، نياز شاهه ۽ ٻين عوامي پريس ڪلب ملير آڏو ڌرڻو هڻي لاڳاپيل ادارن خلاف سخت نعريبازي ڪئي.مظاهرين جو چوڻ هو ته هڪ هفتي کان علائقو اونداهي ۾ ٻڏل آهي ۽ ڪي اليڪٽرڪ ٽيڪنيڪل فالٽ جو جواز ڄاڻائي مسئلو حل ڪرڻ بدران وقت گذاري رهي آهي. هنن چيو ته پاڻي جي کوٽ سبب گهرن توڙي مسجدن ۾ پيئڻ ۽ وضو لاءِ به پاڻي موجود ناهي، جڏهن ته گيس جي بندش سبب روزمره زندگي مفلوج ٿي وئي آهي.رهواسين الزام هنيو ته گيس انتظاميا ڀرپاسي ۾ غيرقانوني ڪنيڪشن لڳائڻ سبب پريشر گهٽجي ويو آهي، جنهن ڪري باقاعدي بل ادا ڪندڙ صارفين سخت اذيت کي منهن ڏئي رهيا آهن، جڏهن ته قومي خزاني کي پڻ ڪروڙين رپين جو نقصان پهچي رهيو آهي. سندن چوڻ هو ته بار بار شڪايتن باوجود لاڳاپيل ادارا ٽس کان مس ناهن ٿيا ۽ رهواسين کي ڄاڻي واڻي تڪليف ۾ رکيو پيو وڃي.احتجاج ڪندڙن خبردار ڪيو ته جيڪڏهن 24 ڪلاڪن اندر بجلي، پاڻي ۽ گيس جي فراهمي بحال نه ڪئي وئي ته احتجاج جو دائرو وڌائي مين قومي شاهراه بند ڪئي ويندي، جنهن جي مڪمل ذميواري انتظاميا تي عائد ٿيندي. هنن چيو ته بنيادي انساني حقن کان محروم رکڻ ڪنهن به صورت ۾ قبول نه ڪيو ويندو.