نوشهروفيروز ۾ شھيد اقبال لاڙڪ جي ٻي ورسي جي موقعي تي تقريب منعقد

اقبال لاڙڪ جي اباڻي ڳوٺ کاھي راھو ۾ منعقد تقريب ۾ ايريگيشن ملازمن جي به شرڪت

نوشهروفيروز (ڊ ر)شھيد اقبال لاڙڪ جي ٻي ورسي سندس اباڻو ڳوٺ کاھي راھو، نوشهروفيروز لڳ، عقيدت ۽ احترام سان ملهائي وئي. تقريب ۾ سنڌ جي مختلف ضلعن مان آيل ايريگيشن کاتي جي پورهيت اڳواڻن، ڪارڪنن ۽ سماجي شخصيتن وڏي انگ ۾ شرڪت ڪري شھيد اڳواڻ جي خدمتن کي ڀيٽا پيش ڪئي. تقريب جي شروعات قرآن پاڪ جي تلاوت سان ٿي، جيڪا محمد رمضان سيال ادا ڪئي. آجياڻي خطاب ڪندي اسڪارپ ايمپلائيز يونين نوشهروفيروز جي صدر ساگر يوسف منگي چيو ته شھيد اقبال لاڙڪ رڳو هڪ مزدور اڳواڻ نه پر پورهيتن جي تحريڪ جو هڪ مضبوط ادارو هئا، جن سنڌ ۾ سوين نوجوان پورهيت اڳواڻ پيدا ڪري مزدورن کي حقن لاءِ جدوجهد ڪرڻ جو شعور ڏنو. تقريب جي صدارت ڪندي آل سنڌ ايريگيشن ٽريڊ يونينز فيڊريشن جي صدر ۽ مھراڻ ليبر فيڊريشن پاڪستان جي صدر الحاج ميان عبدالرحيم ڀارو چيو ته شھيد اقبال لاڙڪ پنهنجي سڄي زندگي پورهيتن جي حقن لاءِ وقف ڪري ڇڏي ۽ آخري گهڙي تائين مزدورن جي خدمت ۾ رهيا. هن سنڌ حڪومت ۽ ايريگيشن کاتي جي عملدارن کي خبردار ڪيو ته جيڪڏهن نوڪرين جي وڪري يا پورهيتن سان ناانصافيون جاري رهيون ته پورهيت سخت احتجاجي تحريڪ هلائيندا. ان موقعي تي آل سنڌ ايريگيشن ٽريڊ يونينز فيڊريشن جي صوبائي جنرل سيڪريٽري ياسر اقبال لاڙڪ چيو ته شھيد اقبال لاڙڪ جو نالو سنڌ جي پورهيتن لاءِ حوصلي ۽ جدوجهد جي علامت بڻيل آهي. هن اعلان ڪيو ته عيدالفطر کانپوءِ پورهيتن جي حقن لاءِ نئين جدوجهد شروع ڪئي ويندي. تقريب ۾ حاجي لائيق برفت، حاجي شعيب بلر، نياز ٻگهيو، محمد يونس راڄپر سميت ڪيترن ئي پورهيت اڳواڻن ۽ سماجي شخصيتن شرڪت ڪئي. آخر ۾ شھيد اقبال لاڙڪ جي ايصالِ ثواب لاءِ دعا گهري وئي ۽ شرڪت ڪندڙن لاءِ خيرات ۽ لنگر جو اهتمام پڻ ڪيو ويو.