ملير: ميمڻ ڳوٺ ۾ هٿياربندن جي فائرنگ ۾ 2 ڄڻا قتل، نوجوان ناري سخت زخمي

هٿياربندن جي فائرنگ ۾ سيفل جوکيو، غلام حيدر قتل، نيها مسيح زخمي ٿي پئي

ملير (رپورٽ: عبدالرشيد مورجھريو) ميمن ڳوٺ ٿاڻي جي حد ۾ لڪي سيمينٽ فيڪٽري ڀرسان نامعلوم هٿياربندن اوچتو فائرنگ ڪري ڏني جنهن جي نتيجي ۾ ٻه ڄڻا موقعي تي ئي مارجي ويا ۽ هڪ عورت زخمي ٿي پئي. فوتين جي سڃاڻپ سيفل ولد نواب جوکيو ۽ غلام حيدر ولد محمد اسلم طور ٿي آهي.واقعي ۾ نيهه مسيح زال شهزاد پڻ زخمي ٿي، جنهن کي فوري طور طبي امداد لاءِ اسپتال منتقل ڪيو ويو، جتي سندس حالت ڳڻتي جوڳي ٻڌائي وڃي ٿي. پوليس موجب فوتين جا لاش قانوني ڪارروائي لاءِ جناح اسپتال منتقل ڪيا ويا آهن، جتي ضروري ڪارروائي ۽ پوسٽ مارٽم بعد لاش وارثن حوالي ڪيا ويندا.ايس ايڇ او ميمن ڳوٺ جو چوڻ آهي ته واقعي جا ڪارڻ هن وقت تائين سامهون نه اچي سگهيا آهن، جڏهن ته پوليس واقعي واري هنڌ تان شاهديون گڏ ڪري جاچ شروع ڪري ڇڏي آهي. جوابدارن جي گرفتاري لاءِ علائقي ۾ ڇاپا هنيا پيا وڃن ۽ مختلف رخن کان جاچ جاري آهي.پوليس اختيارين موجب شروعاتي طور واقعو ذاتي دشمني يا ٻين سببن جو نتيجو ٿي سگهي ٿو. واقعي کان پوءِ علائقي ۾ خوف ۽ هراس پکڙجي ويو آهي.