ملير: ابراهيم حيدري ٽائون ۽ يوسي چوڪنڊي انتظاميه صفائي ڪرائڻ ۾ ناڪام

شھري توحيد حسين ايڊووڪيٽ عدالت پهچي ويو، ڌريون 19 فيبروري تي طلب، نوٽيس جاري

ملير (رپورٽ: عبدالرشيد مورجھريو) ٽائون ڪارپوريشن ابراهيم حيدري ۽ يو سي چوڪنڊي ون جي مبينا ناقص ڪارڪردگي خلاف هڪ شھري ملير عدالت پهچي درخواست داخل ڪئي جنهن بعد عدالت لاڳاپيل اختيارين کي نوٽيس جاري ڪري ذاتي حيثيت ۾ طلب ڪري ورتو آهي۔شھري توحيد حسين ايڊووڪيٽ قلم 133 تحت سينيئر سول جج ۽ جوڊيشل مئجسٽريٽ ملير جي عدالت ۾ درخواست داخل ڪندي مؤقف اختيار ڪيو ته ٽائون ابراهيم حيدري ۽ يو سي چوڪنڊي ون جي انتظاميا صفائي سٿرائي ۽ نيڪالِ آب جي نظام کي بهتر بڻائڻ ۾ ناڪام ٿي چڪي آهي، جنهن سبب مختلف علائقن ۾ رستن تي ڪچري جا ڍير ۽ گٽرن جو پاڻي بيٺل رهي ٿودرخواستگذار عدالت کان استدعا ڪئي ته لاڳاپيل ادارن کي فوري طور صفائي ۽ سيوريج جا مسئلا حل ڪرڻ جو پابند بڻايو وڃي ته جيئن رهواسين کي پيش ايندڙ تڪليفن جو ازالو ٿي سگهي۔عدالت درخواست تي ڪارروائي ڪندي چيئرمين ٽائون ڪارپوريشن ابراهيم حيدري، چيئرمين يو سي چوڪنڊي، يو سي ڪائونسلرز، ڊپٽي ڪمشنر ملير، اسسٽنٽ ڪمشنر ملير ۽ ايس ايڇ او ٿاڻو شاهه لطيف ٽائون کي فريڪ بڻائيندي نوٽيس جاري ڪري ڇڏيا آهن ۽ کين 19 فيبروري 2026ع تي ذاتي حيثيت ۾ پيش ٿيڻ جو حڪم ڏنو آهي۔ علائقي واسين جو چوڻ آهي ته ڪيترن ئي مهينن کان صفائي جو نظام درهم برهم آهي، گهٽيون ۽ رستا گندي پاڻي سان ڀريل رهن ٿا جڏهن ته ڪچرو وقت سر نه کنيو وڃي ٿو۔ رهواسين موجب بار بار شڪايتن باوجود ڪا اثرائتي ڪارروائي نه ڪئي وئي، جنهن بعد عدالت سان رجوع ڪرڻو پيو رهواسين اميد ظاهر ڪئي آهي ته عدالتي مداخلت کان پوءِ لاڳاپيل ادارا عملي قدم کڻندا ۽ علائقي کي صاف سٿرو بڻايو ويندو۔