نوشهرو فيروز ۾ گوبند مالهيءَ جي 25هين ورسي جي موقعي تي تقريب منعقد

دادا گوبند مالهي علم ۽ ادب جي لاٽ ٻاري سنڌيت کي وڏو شعور ڏنو، سندس ڪتاب معاشري جي عڪاسي ڪن ٿا: مقرر

نوشهرو فيروز(ڊ ر)سنڌي ادبي سنگت شاخ نوشهرو فيروز ۽ شاخ بچل مهر پاران سنڌي ادبي سنگت، سنڌ جي باني ۽ نامياري ناول نگار، ڪهاڻيڪار ۽ ناٽڪ نويس دادا گوبند مالهيءَ جي ياد ۾ گل نڇاور ڪرڻ لاءِ سندس مداح 25 هين ورسي تي گڏ ٿيا ۽ هڪ تقريب منعقد ڪئي ويئي، جنهن جي صدارت سنگت جي بنا مقابلي نئين چونڊيل ضلع رابطہ سيڪريٽري مختيار علي شلھ ”مختيار“ ڪئي ۽ خطاب ڪندي چيو تہ دادا گوبند مالهي علم ۽ ادب جي لاٽ ٻاري سنڌيت کي وڏو شعور ڏنو، سندس ڪتاب معاشري جي عڪاسي ڪن ٿا ۽ خاص ڪري سندس ناولن جي ڪري ادبي دنيا ۾ وڏو انقلاب آيو. مهمان خاص سنگت ڏيپارجا جي سيڪريٽري محبتي ملاح چيو تہ دادا گوبند مالهي ادب سان گڏوگڏ سياسي ميدان ۾ بہ سرگرم رهيو ۽ ڪميونسٽ پارٽي سان واڳيل رهيو، تہ ليکڪن جي تنظيم جو بہ بنياد وڌائين، گوبند مالهي علم ادب جو وڏو نالو آهي. ايم ظفر تڳر چيو تہ دادا گوبند مالهي 1946ع ۾ ڊي جي سنڌ ڪاليج ۾ پروفيسر گربخشاڻيءَ جي رهنمائيءَ ۾ سنڌي ادبي سرڪل جو بنياد وڌو، جنهن جي سرگرمين ۾ نارائڻ شيام، شيخ اياز، شيخ رزاق، ارجن شاد، روشن آرا مغل، سُندري اُتمچنداڻي حصو وٺندا هئا، اڳتي هلي ورهاڱي سبب سرگرميون گهٽيون پر هڪ سنگت ۽ اها سنڌي ادبي سنگت وجود ۾ اچي ويئي. سنڌي ادبي سنگت شاخ نوشهرو فيروز جي سيڪريٽري امجد ميمڻ چيو تہ علم ادب ۽ شعور کي اُجاڳر ڪرڻ ۾ دادا گوبند مالهيءَ جو وڏو نالو آهي، کيس سنڌي ادبي سنگت جو بنياد رکڻ جو بہ اعزاز حاصل آهي. پريس ڪلب نوشهرو فيروز جي صدر محمد يونس راڄپر چيو تہ گوبند مالهي، سنڌي ادب کي 52 ڪتاب ڏنا ۽ 1935ع کان رسالن ۽ اخبارن ۾ ليک لکڻ شروع ڪيا. ان موقعي تي سنگت شاخ نوان جتوئي جي ڪائونسلر سبحان سوز جتوئي، شاخ هالاڻي جي سيڪريٽري جبار ملاح، شاخ بچل مهر جي سيڪريٽري مير حسن مهر، ليکڪ اعجاز ممنائي، پريس ڪلب جي جنرل سيڪريٽري علي نواز ”ناز“ سولنگي، شاعر غلام حسن ڪلهوڙو، سنگت شاخ لاکاروڊ جي سيڪريٽري نور محمد ناز، ۽ ٻين خطاب ڪيو جڏهن تہ فنڪار سيد اديب شاھ محفل ۾ ڳائي خوب داد حاصل ڪيو.