ڪراچي جي نور محمد ڳوٺ ۾ انڪروچمينٽ ڄاڻائي آپريشن، ڇڪتاڻ،چڪريون

اينٽي انڪروچمينٽ پوليس، روينيو عملدار، پوليس ۽ ٻين لاڳاپيل عملدارن پاران ڪارروائي ڪئي وئي

اوڀر ڪراچي (رپورٽ: اعجاز چانڊيو) نور محمد ڳوٺ ۾ عدالتي حڪمن تحت ڪيل اينٽي انڪروچمينٽ آپريشن دوران سخت ڇڪتاڻ پيدا ٿي وئي، جنهن بعد انتظاميه کي ڪارروائي روڪي واپس وڃڻو پيو۔ اينٽي انڪروچمينٽ پوليس، روينيو کاتو، مقامي پوليس، سوئي سدرن گيس، ڪي اليڪٽرڪ ۽ واٽر بورڊ جا عملدار ممڪن قبضا ختم ڪرائڻ ۽ گهرن جي ڊاهڻ لاءِ علائقي ۾ پهتا سرڪاري مؤقف هو ته ڪارروائي عدالت جي حڪمن جي روشني ۾ ڪئي پئي وڃي۔ ڪارروائي خلاف علائقي واسين احتجاج ڪيو، جنهن ۾ عورتون، مرد ۽ ٻار وڏي انگ ۾ شريڪ هئا۔ مظاهرين بينر ۽ پلي ڪارڊ کڻي پنهنجن گهرن جي تحفظ جو مطالبو ڪيو۔ عيني شاهدن موجب پوليس طرفان ميڙ کي منتشر ڪرڻ لاءِ واٽر ڪينن جو استعمال ڪيو ويو ۽ آنسو گيس جي شيلنگ ڪئي وئي، جنهن سبب ڪيترائي ماڻهو متاثر ٿيا۔ مقامي ماڻهن جو چوڻ آهي ته شيلنگ سبب ٻارن ۽ عورتن کي ساهه کڻڻ ۾ ڏکيائيون پيش آيون۔ بعد ۾ ڪجهه ماڻهن طرفان مبينا پٿراءُ پڻ ڪيو ويو، جنهن سان صورتحال وڌيڪ ڇڪتاڻ واري بڻجي وئي۔ ذريعن موجب هن زمين بابت معاملو عدالت ۾ زيرِ سماعت آهي، جنهن سبب رهواسين ۾ بيچيني موجود آهي۔ مظاهرين جو مؤقف آهي ته عدالتي فيصلو اچڻ تائين ڪنهن به قسم جي مسماري يا بي دخلي نه ٿيڻ گهرجي۔ سخت مزاحمت ۽ حالتن جي خرابي سبب انتظاميه کي عارضي طور آپريشن روڪي واپس وڃڻو پيو۔ واقعي بعد علائقي ۾ ڪا اضافي نفري مقرر نه ڪئي وئي۔ هن وقت تائين ڪنهن جاني نقصان جي سرڪاري تصديق سامهون ناهي آئي۔ انساني حقن جي حلقن طرفان واقعي جي شفاف جاچ ۽ طاقت جي استعمال جي جائزي جو مطالبو ڪيو پيو وڃي۔