رزاق آباد پوليس ٽريننگ سينٽر لڳ وڏي پئماني تي گيس چوري جو انڪشاف

ملير (رپورٽ: عبدالرشيد مورجھريو)رزاق آباد پوليس ٽريننگ سينٽر سامھون گيس جي مين ڊسپوزل پوائنٽ تي وڏي پئماني تي گيس چوري جو انڪشاف ٿيو آهي. علائقي ۾ هلندڙ ڪم دوران ٽي انچن جون ٻه غيرقانوني گيس ڪنيڪشنون ٽٽي پيون، جنهن سبب تيزي سان گيس ضايع ٿيڻ لڳي ۽ علائقو گيس سان ڀرجي ويو.مقامي ماڻهن موجب، مين ڊسپوزل تي غيرقانوني ڪنيڪشنن ذريعي ڪافي عرصي کان گيس چوري ڪئي پئي وڃي، جنهن سان قومي خزاني کي لکين رپين جو نقصان پهچي رهيوآهي.ڪنيڪشن ٽٽڻ بعد تيز آواز سان گيس خارج ٿيڻ لڳي، جنهن سبب ڀرپاسي رهواسين ۾ خوف ۽ هراس پکڙجي ويو، جڏهن ته ڪنهن به وڏي حادثي جو خدشو پڻ پيدا ٿي ويو.علائقي واسين جو چوڻ آهي ته گيس ليڪيج بابت فوري طور گيس انتظاميا کي اطلاع ڏنو ويو، پر شڪايت باوجود لاڳاپيل عملو گهڻي دير تائين واقعي واري هنڌ نه پهتو. رهواسين جو الزام آهي ته گيس انتظاميا جي لاپرواهي سبب قيمتي گيس ضايع ٿيندي رهي، جڏهن ته ڪنهن به قسم جي ايمرجنسي ريسپانس نظر نه آئي.شهرين مطالبو ڪيو آهي ته رزاق آباد جهڙي حساس علائقي،جتي پوليس ٽريننگ سينٽر پڻ موجود آهي، اتي گيس چوري هڪ ڳڻتي جوڳي ڳالهه آهي. هنن چيو ته غيرقانوني ڪنيڪشن نه رڳو قومي وسيلن جي لٽ مار آهن، پر انساني زندگين لاءِ به وڏو خطرو بڻيل آهن.علائقي واسين ۽ سماجي حلقن اعليٰ اختيارين کان مطالبو ڪيو آهي ته گيس چوري ۾ ملوث عنصرن خلاف سخت قانوني ڪارروائي ڪئي وڃي، غيرقانوني ڪنيڪشنن کي فوري ختم ڪيو وڃي ۽ گيس انتظاميا جي ذميوارن عملدارن خلاف به جاچ ڪري کين جوابده بڻايو وڃي، ته جيئن مستقبل ۾ اهڙن واقعن جي روڪٿام ٿي سگهي.