ٺٽو: چليا واسين سان ڪراچي ۾ حادثو، عورت فوت، سندس مڙس زخمي

گلشن حديد ۾ ٽرالر ۽ موٽرسائيڪل ۾ ٽڪر ٿي پيو

ٺٽو(ڊر) گلشن حديد ٽرئفڪ پوليس چوڪي ڪراچي وٽ ٽرالر ۽ موٽر سائيڪل ۾ خوفناڪ ٽڪر ٿيڻ جي نتيجي ۾ چليا واسي موٽرسائيڪل سوار ڪرامت الله خاصخيلي جي گھر واري موقعي تي چيڀاٽجي فوت ٿي ويئي، جڏھن تہ ڪرامت الله سخت زخمي ٿي پيو، فوتي عورت جو لاش ۽ زخمي کي مقامي اسپتال علاج لاء منتقل ڪيو ويو، جتان فوتي عورت جو لاش پوليس ضروري ڪاروائي بعد وارثن حوالي ڪري ڇڏيو، لاش ٺٽي لڳ چليا گھر پھچڻ تي گھر ۾ ڪھرام مچي ويو، کيس چليا جي قبرستان ۾ مٽي ماء حوالي ڪيو ويو، ٻئي طرف چليا مدرسي ويجهو ٺٽو/حيدرآباد روڊ تي موٽر سائيڪل، آئل ۽ چانورن سان ڀريل ٻن ٽرالرن ۾ آمھون سامھون ٽڪر ٿيڻ جي نتيجي ۾ ھڪ ٽرالر ۾ ڊرائيور ۽ ڪلينر گاڏي اندر ڦاسي زخمي ٿي پيا، جن کي مقامي ماڻھن پاران وڏين ڪوششن بعد ڪڍي سول اسپتال مڪلي منتقل ڪيو، پر انتظاميه ۽ ريسڪيو ٽيمن زخمين جي ڪابہ مدد نہ ڪئي. نہ ئي زخمين جا نالا معلوم ٿي سگھيا آھن جڏھن تہ ھڪ ٽينڪر ڪلٽي ٿيڻ سان گڏ موٽر سائيڪل پڻ تباھ ٿي ويو آھي، جڏھن تہ ٻنھي زخمين جي پڻ حالت ڳڻتي جوڳي ٻڌائي پئي وڃي.