ڊويزنل ڪمشنر حيدرآباد فياض عباسي ۽ ڊي آءِ جي طارق رزاق ڌاريجو جي صدارت هيٺ اجلاس

ونڊ پاور ڪمپنيون قومي معيشت ۾ انتهائي اهم ڪردار ادا ڪري رهيون آهن: فياض عباسي

ٺٽو( محمد شفيق ڀٽي)ڊويزنل ڪمشنر حيدرآباد فياض حسين عباسي ۽ ڊي آءِ جي حيدرآباد طارق رزاق ڌاريجو جي صدارت هيٺ ضلعي ۾ قائم ونڊ پاور ۽ سولر انرجي منصوبن کي درپيش سيڪيورٽي مسئلن ۽ ڪارپوريٽ سوشل ريسپانسبلٽي (سي ايس آر) تحت جاري ترقياتي قدمن جو جائزو وٺڻ لاءِ درٻار هال مڪلي ۾ هڪ اهم اجلاس منعقد ٿيو. اجلاس ۾ ڊپٽي ڪمشنر ٺٽو سرمد علي ڀاڳت، ايس ايس پي ٺٽو فاروق بجاراني، ونڊ پاور ۽ سولر منصوبن جا مينيجرز ۽ نمائندا توڙي انرجي ڊپارٽمينٽ جا آفيسر شريڪ ٿيا. ان موقعي تي ڊويزنل ڪمشنر فياض حسين عباسي چيو ته ونڊ پاور ڪمپنيون قومي معيشت ۾ انتهائي اهم ڪردار ادا ڪري رهيون آهن ۽ انهن منصوبن جو تحفظ قومي ذميواري آهي . هن زور ڏنو ته سيڪيورٽي ۽ ٻين درپيش مسئلن جي حل لاءِ اثرائتو ميڪينزم جوڙيو وڃي ته جيئن سيڪيورٽي انتظام وڌيڪ بهتر بڻائي سگهجن ۽ انتظاميا ۽ ڪمپنين وچ ۾ رابطي جو خلاءُ ختم ٿي سگهي. هن منصوبن جي انتظاميا کي هدايت ڪئي ته ضلعي انتظاميا سان مسلسل رابطي ۾ رهن ۽ ڪنهن به مسئلي جي صورت ۾ سڌي طرح انتظاميا سان رابطو ڪن، ڇو ته ضلعي آفيسن جا در هميشه کليل آهن. هن چيو ته مقامي آبادي کي سي ايس آر تحت بنيادي سهولتن جي فراهمي کي يقيني بڻايو وڃي. ڊويزنل ڪمشنر يقين ڏياريو ته سڀني منصوبن کي آن گرائونڊ مڪمل سهڪار فراهم ڪيو ويندو . ڊي آءِ جي حيدرآباد طارق رزاق ڌاريجو اجلاس کي خطاب ڪندي چيو ته ونڊ ۽ سولر منصوبن جي سيڪيورٽي لاءِ اثرائتا ۽ بهتر انتظام يقيني بڻايا ويندا ۽ ان حوالي سان پوليس پنهنجو ڀرپور ڪردار ادا ڪندي. اجلاس ۾ ونڊ ۽ سولر انرجي منصوبن جي انتظاميا سيڪيورٽي، چوري ۽ ٻين مسئلن بابت آگاهي ڏيندي ٻڌايو ته سڀئي يونٽس سي ايس آر تحت سرگرم عمل آهن ۽ مقامي ماڻهن کي روزگار، صحت ۽ ٻين بنيادي سهولتن جي فراهمي لاءِ عملي قدم کنيا پيا وڃن، جيڪي مقامي ماڻهن جو بنيادي حق آهن. هنن انتظاميا جي فوري ۽ مثبت ردعمل تي اطمينان جو اظهار ڪندي چيو ته اهڙن قدمن سان نه رڳو انتظاميا پر غير ملڪي سيڙپڪارن کي پڻ مثبت پيغام ملندو.