ابراهيم حيدري ٽائون آفيس لڳ رزاق آباد جو سيوريج نظام مڪمل طور تباهه

گٽرن جو گندو پاڻي گهٽين، رستن ۽ بازارن ۾ داخل، رهواسين پاران احتجاج ڪيو ويو

ملير (رپورٽ: عبدالرشيد مورجھريو)ملير ضلعي جي هيڊ ڪوارٽر رزاق آباد ۾ سيوريج جو نظام مڪمل طور تي تباهه ٿي چڪو آهي. ابراهيم حيدري ٽائون آفيس جي بلڪل لڳ واقع علائقن ۾ گٽر جو گندو پاڻي گهرن، گهٽين، رستن ۽ بازارن ۾ وهڻ لڳو آهي، جنهن سبب علائقو تلاءَ جو منظر پيش ڪري رهيو آهي. بدبو، گندگي ۽ بيٺل گندي پاڻي سبب روزاني زندگي مفلوج ٿي وئي آهي جڏهن ته وبائي بيمارين ڦهلجڻ جو به وڏو خدشو پيدا ٿي ويو آهي.علائقي واسين موجب سيوريج لائينون مهينن کان بند پيل آهن، بار بار شڪايتن باوجود نه ٽائون انتظاميا ۽ نه ئي يوسي چوڪنڊي انتظاميا ڪو سنجيده قدم کنيو آهي. رهواسين الزام هنيو آهي ته اربين روپين جي بجيٽ، جيڪا سيوريج ۽ بنيادي سهولتن لاءِ مختص ڪئي وئي هئي، اها هڙپ ڪئي وئي آهي ۽ زميني سطح تي ڪا به ترقي نظر نٿي اچي.رهواسين جو چوڻ آهي ته گندو پاڻي گهرن اندر داخل ٿي رهيو آهي، جنهن سبب عورتون، ٻار ۽ بزرگ سخت پريشان آهن. ڪاروباري مرڪز ۽ بازارون به گندي پاڻي هيٺ اچي ويون آهن، جنهن ڪري واپار سخت متاثر ٿي رهيو آهي. اسڪول ويندڙ ٻار به گندي پاڻي مان گذرڻ تي مجبور آهن.ان صورتحال خلاف علائقي واسين سخت احتجاج ڪندي مطالبو ڪيو ته فوري طور تي گندي پاڻي جي نيڪال جو بندوبست ڪيو وڃي، سيوريج لائينن جي مرمت ڪئي وڃي ۽ ذميوار آفيسرن خلاف قانوني ڪارروائي ڪئي وڃي.رهواسين چتاءُ ڏنو آهي ته جيڪڏهن فوري قدم نه کنيا ويا ته احتجاج جو دائرو وڌايو ويندو ۽ اعليٰ اختيارين سميت ميڊيا ۽ عدالتن جو در کڙڪايو ويندو. عوام جو چوڻ آهي ته رزاق آباد، جيڪو ملير ضلعي جو هيڊ ڪوارٽر آهي، اتي اهڙي بدترين صورتحال انتظاميا جي نااهلي جو کليل ثبوت آهي.