شاهه لطيف پوليس پاران چوپائي مال جي چوري ۾ ملوث 02 جوابدار گرفتار ڪرڻ جي دعويٰ

ملير (رپورٽ: عبدالرشيد مورجھريو)گذريل رات شاهه لطيف پوليس مبينا مقابلي ۾ چوپائي مال گاڏين ۽ واڙن مان چوريون ڪندڙ 02 جوابدارن کي گرفتار ڪرڻ جي دعويٰ ڪئي آهي، جنهن دوران هڪ جوابدار زخمي ٿي پيو. ڪارروائي 31-بي ڪچا روڊريلوي پٽڙي ڀرسان ڪئي وئي.پوليس موجب گشت دوران ٻن مشڪوڪ ماڻهن کي روڪيو ويو ته هنن پوليس پارٽي تي فائرنگ شروع ڪري ڏني. پوليس جي جوابي فائرنگ ۾ هڪ جوابدار زخمي حالت ۾ گرفتار ڪيو ويو، جڏهن ته سندس ساٿي کي بنا ڪنهن مزاحمت جي گرفتار ڪيو ويو.ابتدائي جاچ موجب جوابدار شهرين جي واڙن ۽ گهرن ۾ گهڙي ڊڪيتون ڪري ڀينسون ۽ ٻڪريون کڻي ويندا هئا.زخمي جوابدار جي سڃاڻپ محمد هاشم ولد ڏري بخش جڏهن ته گرفتار ٿيل ٻئي جوابدار جي سڃاڻپ محمد رياض ولد محمد رمضان طور ٿي آهي. زخمي جوابدار وٽان 30 بور پستول ۽ 03 زندهه رائونڊ جڏهن ته ٻئي جوابدار وٽان 05 رائونڊ هٿ ڪيا ويا.پوليس موجب ٻئي جوابدار بدنام زمانه مويشي ڊڪيت گينگ سان لاڳاپيل آهن، جيڪي شهر جي مختلف علائقن، جن ۾ ڀينس ڪالوني، شاهه لطيف، اسٽيل ٽائون ۽ ميمڻ ڳوٺ شامل آهن، ۾ ڪيترين ئي وارداتن ۾ ملوث رهيا آهن.گرفتار ٿيل جوابدار محمد هاشم جو رڪارڊ سرچ ڊيوائس ذريعي چيڪ ڪيو ويو، جنهن مان ظاهر ٿيو ته هو اڳ به ڪيترائي ڀيرا جيل وڃي چڪو آهي ۽ سندس مجرمانه رڪارڊ موجود آهي.وڌيڪ جاچ جاري آهي جڏهن ته ٻين ساٿين جي گرفتاري لاءِ ڇاپا هنيا پيا وڃن.