راندين واري کاتي پاران ٺٽي ۾ ڍڳن جي ڊوڙ جو مقابلو ڪرايو ويو

روايتي ۽ ثقافتي راند “ ڪوهستان ڍڳن جي ڍوڙ ” جو شاندار مقابلو شاھ مراد شيرازي گرائونڊ تي ٿيو

ٺٽو( رپورٽ شفيق ڀٽي)راندين واري کاتي جي اهتمام هيٺ ٺٽي ۾ روايتي ۽ ثقافتي راند “ ڪوهستان ڍڳن جي ڍوڙ ” جو شاندار مقابلو شاھ مراد شيرازي گرائونڊ تي منعقد ڪيو ويو ، جنهن ۾ ٺٽو ، سجاول ۽ بدين ضلعن جي سينگاريل ۽ تيار ڪيل ڍڳن شرڪت ڪئي . مقابلي دوران دليل چانگ ، حاجي خيرو ڪهيو ، پپو گجر ، اشفاق مينڌرو ، گهنور گابار ، ڌڻي بخش لاشاري ، موسيٰ شيدي ۽ حبيب پٽيل جي ڍڳن وچ ۾ دلچسپ ۽ سخت مقابلا ٿيا ، جتي ڍڳي گاڏين ۾ جوٽيل ڍڳن هڪ ٻئي کان اڳتي نڪرڻ لاءِ زبردست ڊوڙ ڏيکاري . مقابلي ڏسڻ لاءِ وڏي انگ ۾ شوقين ماڻهن جي موجودگي سبب گرائونڊ ۾ ميلي جهڙو دلڪش ماحول بڻجي ويو . تقريب ۾ صوبائي وزير رياض حسين شاهه شيرازي ، راندين واري کاتي جي صوبائي سيڪريٽري منور حسين مهيسر ، ضلعي اسپورٽس آفيسر اظھر علي بروهي سميت ضلعي جي مختلف علائقن کان آيل ٻيا معزز مهمان پڻ وڏي انگ ۾ شريڪ ٿيا . ان موقعي تي صوبائي وزير رياض حسين شاهه شيرازي پنهنجي خطاب ۾ چيو ته سنڌ جون روايتي رانديون اسان جي ثقافت ۽ سڃاڻپ جو اهم حصو آهن . ڍڳن جي ڍوڙ جهڙيون رانديون نه رڳو صحتمند تفريح فراهم ڪن ٿيون پر نوجوانن کي منشيات ۽ غير صحتمند مشغلن کان پري رکڻ ۾ پڻ مددگار ثابت ٿين ٿيون - هن چيو ته سنڌ حڪومت راندين کي هٿي ڏيڻ لاءِ هر سطح تي سهڪار ڪندي ۽ اهڙن ثقافتي مقابلن کي باقاعدگي سان ڪرائڻ لاءِ ڪوششون جاري رکندي. راندين واري کاتي جي صوبائي سيڪريٽري منور حسين مهيسر چيو ته روايتي راندين جي واڌ ويجهه سان سياحت کي پڻ هٿي ملي ٿي ۽ مقامي ماڻهن لاءِ روزگار جا موقعا پيدا ٿين ٿا. هن وڌيڪ چيو ته راندين وارو کاتو ڪوشش ڪري رهيو آهي ته سنڌ جي هر ضلعي ۾ مقامي راندين جا مقابلا منظم ڪري نوجوانن کي مثبت سرگرمين ڏانهن راغب ڪيو وڃي- آخر ۾ مهمانن پاران ڪامياب ٿيندڙ ڍڳن جي مالڪن ۽ واهيٽن ۾ انعام ۽ شيلڊون ورهايون ويون ، جڏهن ته شرڪت ڪندڙن اهڙي شاندار تقريب منعقد ڪرڻ تي راندين واري کاتي کي ساراهيو ويو ۽ مطالبو ڪيو ته اهڙا مقابلا مستقبل ۾ به باقاعدگي سان جاري رکيا وڃن.