مونگ پھلی بطور اسنیک: ماہرین کے مطابق کھانے کا بہترین وقت کون سا ہے؟

غذائی ماہرین کا کہنا ہے کہ مونگ پھلی کو مناسب مقدار اور درست وقت پر کھانے سے اس کے صحت بخش فوائد بھرپور طور پر حاصل کیے جا سکتے ہیں۔

مونگ پھلی کو غذائیت سے بھرپور اسنیک سمجھا جاتا ہے، تاہم ماہرین صحت اس بات پر زور دیتے ہیں کہ اس کا استعمال اعتدال میں ہونا چاہیے، کیونکہ ایک وقت میں زیادہ مقدار کھانے سے بعض افراد کو مضر اثرات کا سامنا بھی ہو سکتا ہے۔ ماہرین کے مطابق مونگ پھلی پروٹین، صحت مند چکنائی، فائبر اور کئی ضروری غذائی اجزا سے بھرپور ہوتی ہے۔ اس میں شامل صحت مند فیٹس جسم میں خراب کولیسٹرول (ایل ڈی ایل) کی سطح کم کرنے میں مدد دیتے ہیں، جبکہ میگنیشیم، فولک ایسڈ، کاپر اور امائنو ایسڈ آر جینین مجموعی صحت کے لیے فائدہ مند سمجھے جاتے ہیں۔ غذائی ماہرین کا کہنا ہے کہ متوازن غذائیت کی وجہ سے مونگ پھلی کو روزمرہ خوراک میں شامل کیا جا سکتا ہے، تاہم روزانہ صرف ایک چھوٹی مُٹھی کو مناسب مقدار قرار دیا جاتا ہے۔ اگر مونگ پھلی کو پینٹ بٹر کی شکل میں استعمال کیا جائے تو ایک بریڈ سلائس پر دو کھانے کے چمچ روزانہ صحت کے لیے کافی سمجھے جاتے ہیں۔ ماہرین کے مطابق مونگ پھلی کھانے کا بہترین وقت شام کا ہوتا ہے، جب اسے ہلکے اسنیک کے طور پر لیا جائے۔ اس وقت استعمال کرنے سے یہ بھوک کو قابو میں رکھنے کے ساتھ ساتھ جسم کو فوری توانائی بھی فراہم کرتی ہے۔ البتہ حساس معدے کے حامل افراد یا مونگ پھلی سے الرجی رکھنے والوں کو اس کے استعمال میں احتیاط برتنے اور ضرورت پڑنے پر ڈاکٹر یا غذائی ماہر سے مشورہ کرنے کا مشورہ دیا جاتا ہے۔