ڪراچي ۽ حيدرآباد جيان دادو ۾ به صحافي ڪالوني جو قيام جلد عمل ۾ ايندو: رفيق احمد جمالي

صحافين جو جمهوريت جي بحالي ۽ مضبوطي لاءِ انتهائي اهم ڪردار آهي: پ پ اڳواڻ

دادو(رپورٽر) پاڪستان پيپلز پارٽي سنڌ جي ڊپٽي جنرل سيڪريٽري سردار رفيق احمد جمالي چيو آهي ته صحافين جو جمهوريت جي بحالي ۽ مضبوطي لاءِ انتهائي اهم ڪردار آهي، ڇو ته صحافي عوام جون اکيون ۽ زبان بڻجي ميڊيا ذريعي سندن آواز اقتدار جي ايوانن تائين پهچائين ٿا.هو دادو پريس ڪلب جي سال 2026–27 لاءِ نئين چونڊيل باڊي جي پروقار حلف برداري تقريب کي خطاب ڪري رهيو هو. ان موقعي تي سردار رفيق احمد جمالي اعلان ڪيو ته دادو پريس ڪلب کي سولر سسٽم فراهم ڪيو ويندو، جڏهن ته ڪراچي ۽ حيدرآباد جيان دادو ۾ پڻ صحافي ڪالوني جو قيام جلد عمل ۾ آندو ويندو.تقريب کي خطاب ڪندي سينيئر صحافي صمسفر گاڏهي ۽ دادو پريس ڪلب جي صدر نظام شيخ چيو ته دادو جا قلم ڌڻي هميشه عوام سان ٿيندڙ ناانصافين، ظلمن ۽ زيادتين کي اجاگر ڪندا رهيا آهن ۽ حڪومت آڏو عوام جا بنيادي مسئلا پيش ڪندا رهندا. هنن چيو ته بنيادي مسئلن جي حل لاءِ ڀرپور ۽ ذميوار رپورٽنگ جاري رهندي. تقريب کي اي ايس ايس پي دادو امير سعود مگسي، بابن پنهور، گلڻ ڀنڊ، ولي چانڊيو، شهزاد ڀنڊ، قربان خشڪ، سيد اظهر شاهه، منظور پنهور، عبدالحڪيم جمالي، رفيق ميراڻي، راجا رفيق پنهور ۽ ٻين پڻ خطاب ڪيو.