ابراهيم حيدري ٽائون آفيس ڀرسان رزاق آباد جو غريب آباد پارڙو مسئلن جي ور چڙهيل

ملير (رپورٽ: عبدالرشيد مورجھريو) ابراهيم حيدري ٽائون جي آفيس لڳ رزاق آباد جو غريب آباد پاڙو بنيادي سهولتن کان محروم ٿي مسئلن جي ور چڙهي ويو آهي لڳاتار عوامي احتجاجن باوجود ٽائون انتظاميا خاموش تماشائي بڻيل آهي علائقي ۾ هر هنڌ گندگي جا ڍير لڳل آهن، جڏهن ته سيوريج نالن جي بندش سبب گندو پاڻي گهٽين ۽ رستن تي بيٺل آهي، جنهن ڪري سخت بدبو پکڙجي چڪي آهي ۽ سڄو علائقو مختلف بيمارين جي لپيٽ ۾ اچي ويو آهي۔ علائقي واسين جو چوڻ آهي ته گندگي ۽ سيوريج سبب ٻارن، بزرگن ۽ عورتن ۾ چمڙي، ساھ ۽ معدي جون بيماريون تيزي سان وڌي رهيون آهن۔ان حوالي سان سنڌ يونائيٽيڊ پارٽي جي اڳواڻ شيراز سولنگي، سماجي اڳواڻ صدام ڪلمتي، جيئي سنڌ محاذ ملير جي صدر فيض هيسباڻي، اقبال ڪلمتي سميت ٻين اڳواڻن سخت ردعمل ظاهر ڪندي چيو آهي ته هي انتهائي افسوسناڪ عمل آهي جو ٽائون انتظاميا ۽ لاڳاپيل ذميوار مڪمل طور خاموش تماشائي بڻيل آهن ۽ عوامي شڪايتن کي نظرانداز ڪيو پيو وڃي۔ هنن چيو ته هو هن غفلت، لاپرواهي ۽ نااهلي جي سخت لفظن ۾ مذمت ڪن ٿا۔محلي واسين مطالبو ڪيو آهي ته صفائي جو نظام فوري طور بحال ڪيو وڃي، سيوريج لائينن جي صفائي ۽ مرمت جو ڪم هنگامي بنيادن تي شروع ڪيو وڃي ۽ ذميوار آفيسرن کي جوابده بڻايو وڃي۔ هنن خبردار ڪيو ته جيڪڏهن مقرر وقت اندر ڪا به ٺوس ۽ عملي ڪارروائي عمل ۾ نه آندي وئي ته پارٽي عوام سان گڏ ڀرپور ۽ پرامن احتجاجي تحريڪ شروع ڪرڻ تي مجبور ٿيندي، جنهن جي سموري ذميواري ٽائون انتظاميا تي عائد ٿيندي۔هنن وڌيڪ چيو ته هي رڳو شڪايت نه پر عوام جو بنيادي حق آهي، ۽ پنهنجي حق لاءِ آواز اٿارڻ هر شعور رکندڙ شهري جو فرض آهي۔