قسمت کا کمال: بھارت میں کھیت میں کام کرنے والے دو دوستوں کو ڈیڑھ کروڑ روپے مالیت کا ہیرا مل گیا

بھارتی ریاست مدھیہ پردیش میں دو غریب دوستوں کی زندگی اس وقت بدل گئی جب انہیں کھیت میں کام کے دوران ایک قیمتی ہیرا مل گیا۔

بھارت میں دو بچپن کے دوستوں کی قسمت ایک ہی لمحے میں بدل گئی، جب انہوں نے کھیت میں کام کے دوران ایک قیمتی ہیرا دریافت کر لیا۔ یہ واقعہ بھارتی ریاست مدھیہ پردیش کے ضلع پنا میں پیش آیا، جو ملک کے معروف ڈائمنڈ بیلٹ کے طور پر جانا جاتا ہے۔ 24 سالہ ستیش کھٹک اور 23 سالہ ساجد محمد نے معمول کے زرعی کام کے دوران 15.3 قیراط وزنی ہیرا دریافت کیا۔ بعد ازاں پنا ڈائمنڈ آفس نے تصدیق کی کہ یہ ہیرا اصلی ہے، جس کی مالیت تقریباً 60 لاکھ بھارتی روپے، یعنی ایک کروڑ 87 لاکھ پاکستانی روپے سے زائد بتائی جا رہی ہے۔ حکام کے مطابق دریافت شدہ ہیرا حکومت کے زیر انتظام نیلامی کے ذریعے فروخت کیا جائے گا۔ موجودہ قواعد کے تحت نیلامی سے حاصل ہونے والی رقم کا 88 فیصد حصہ ہیرے کے دریافت کنندگان کو دیا جائے گا، جبکہ 12 فیصد حکومت کے حصے میں جائے گا۔ ضلع پنا میں ایسی نیلامیاں سرکاری نگرانی میں ہر تین ماہ بعد منعقد کی جاتی ہیں۔ دونوں نوجوانوں کا تعلق غریب خاندانوں سے ہے، جن میں سے ایک قصائی کا کام کرتا ہے جبکہ دوسرا پھل فروش ہے۔ مقامی میڈیا سے گفتگو کرتے ہوئے انہوں نے بتایا کہ وہ اس رقم کو اپنی زندگی بہتر بنانے کے لیے استعمال کریں گے۔ ستیش اور ساجد کے مطابق ان کی پہلی ترجیح جائیداد خریدنا نہیں بلکہ اپنی بہنوں کی شادیاں کرنا ہے، جسے وہ اپنی سب سے بڑی ذمہ داری سمجھتے ہیں۔ واضح رہے کہ ضلع پنا کو بھارت کے اہم ڈائمنڈ بیلٹس میں شمار کیا جاتا ہے، جہاں ماضی میں بھی متعدد بار قیمتی ہیروں کی دریافت ہو چکی ہے، جس کے باعث یہ علاقہ ہیرے کی تلاش کا ایک نمایاں مرکز تصور کیا جاتا ہے۔