ٺٽو: مهانگائي ۽ پيٽرول ليوي خلاف جماعت اسلامي جا ڌرڻا، قومي شاهراهه تي ٽريفڪ معطل

ٺٽو( شفيق ڀٽي)جماعت اسلامي پاڪستان جي مرڪزي سڏ تي مهانگائي، پيٽرول جي وڌندڙ اگهن، ڳرن بجلي بلن، بيروزگاري ۽ پيٽروليم ليوي خلاف اڄ ملڪ گير احتجاج جي سلسلي ۾ ٺٽي ۾ پڻ مختلف هنڌن تي احتجاجي مظاهرا ۽ ڌرڻا هنيا ويا. مڪلي ۾ ڊي سي چوڪ وٽ جماعت اسلامي سنڌ جي ڊپٽي جنرل سيڪريٽري مولانا عبدالقدوس احمداڻي ۽ ٺٽي جي ضلعي اڳواڻن امير عبدالمجيد سمون، جنرل سيڪريٽري عبدالله آدم گندرو، مولانا عطاءُ الرحمان بلوچ، غلام شفيع سمون، محمد خان ملاح ۽ ٻين جي اڳواڻي ۾ ڪارڪنن قومي شاهراهه تي ڌرڻو هڻي روڊ بلاڪ ڪري سخت نعريبازي ڪئي، جنهن سبب ٺٽو-ڪراچي قومي شاهراهه تي ٽريفڪ معطل ٿي وئي ۽ ٻنهي پاسن کان گاڏين جون قطارون لڳي ويون. ان کان علاوه ٺٽي شهر ۾ ميونسپل ڪميٽي آفيس سامهون مين اسٽاپ ۽ ٺٽي باءِ پاس چوڪ تي پڻ مهانگائي خلاف احتجاج ڪيو ويو. ان موقعي تي اڳواڻن خطاب ڪندي چيو ته پيٽروليم شين جي مسلسل وڌندڙ اگهن سبب مهانگائي جي بار عوام جي چيلهه چٻي ڪري ڇڏي آهي، جڏهن ته حڪمران عوام کي رليف ڏيڻ ۾ ناڪام ٿي ويا آهن. هنن چيو ته عوام دشمن معاشي پاليسين، بيروزگاري، ڳرن بجلي بلن ۽ معاشي بدحالي خلاف احتجاج جاري رهندو، ڇاڪاڻ ته هي ڪنهن هڪ جماعت جو نه پر عوام جي بنيادي حقن جو مسئلو آهي. جماعت اسلامي اڳواڻن مطالبو ڪيو ته پيٽرول تي لاڳو ليوي فوري طور ختم ڪري تيل جون قيمتون گهٽايون وڃن، مهانگائي تي ضابطو آڻي روزگار جا موقعا پيدا ڪيا وڃن ۽ عوام کي معاشي بدحالي مان نجات ڏني وڃي. هنن دعويٰ ڪئي ته في ليٽر پيٽرول تي 125 رپيا ليوي جي صورت ۾ عوام تي اضافي بار وڌو پيو وڃي. اڳواڻن وڌيڪ چيو ته جماعت اسلامي سنڌ جي وحدت، وسيلن ۽ آئيني حقن تي يقين رکي ٿي ۽ پاڻي، روزگار ۽ وسيلن جي منصفاڻي ورڇ لاءِ آواز اٿاريندي رهندي. هنن خبردار ڪيو ته مطالبا تسليم نه ڪيا ويا ته احتجاج جو دائرو وڌايو ويندو.