ملير ندي مان معصوم ٻار جو لاش هٿ، بن قاسم ۾ فائرنگ سبب هڪ ڄڻو مارجي ويو

ملير (رپورٽ: عبدالرشيد مورجھريو)ملير ۾ ٻه ڌار ڌار واقعا پيش آيا آهن پهريون واقعو فيوچر موڙ مدينه مسجد جي ويجهو پيش آيو، جتي هڪ ندي مان تقريبن پنجن سالن جي ٻار جي لاش هٿ آئي۔ريسڪيو عملدارن موجب ٻار جي لاش جي سڃاڻپ اڃا تائين نه ٿي سگهي آهي، جڏهن ته لاش کي ضروري قانوني ڪارروائي لاءِ اسپتال منتقل ڪيو ويو آهي۔ پوليس واقعي جي جاچ ڪري رهي آهي ۽ وارثن جي ڳولا جاري آهي۔ٻيو واقعو ملير بن قاسم اسٽيل مل ڦاٽڪ جي ويجهو پيش آيو، جتي نامعلوم ماڻهن جي فائرنگ سبب هڪ شخص سخت زخمي ٿي فوت ٿي ويو۔ ريسڪيو ذريعن موجب فوت ٿيل شخص جي سڃاڻپ خادم جي نالي سان ٿي آهي۔ واقعي کانپوءِ پوليس موقع تي پهچي لاش کي اسپتال منتقل ڪري شواهد گڏ ڪيا آهن۔پوليس جو چوڻ آهي ته ٻنهي واقعن جي الڳ الڳ جاچ جاري آهي، جڏهن ته فائرنگ واري واقعي ۾ ملوث جوابدارن جي گرفتاري لاءِ ڪاروائي شروع ڪئي وئي آهي۔ علائقي جي رهواسين وڌندڙ بدامني ۽ اهڙن افسوسناڪ واقعن تي ڳڻتي جو اظهار ڪندي لاڳاپيل ادارن کان ترت قدم کڻڻ جو مطالبو ڪيو آهي۔